اسلام آباد-وزیراعظم محمد شہباز شریف سے فٹ بال کے کھلاڑی محمد ریاض نے ملاقات کی ہے،وزیراعظم نے ریاض حسین کے ہمت و حوصلے کی تعریف کی اور انہیں 25 لاکھ روپے کا چیک پیش کیا۔
وزیراعظم نے کہا کہ نوجوان ملک کا قیمتی اثاثہ ہے،وہ کھیلوں اور دیگر صحت مند سرگرمیوں میں بڑھ چڑھ کر حصہ لیں، پاکستانی کھلاڑیوں کو ہر قسم کی سہولیات اور انکو بین الاقوامی سطح پر مسابقت کیلئے وسائل کی فراہمی حکومت کی اولین ترجیحات میں شامل ہے۔
محمد شہباز شریف نے محمد ریاض سے گفتگو کرتے ہوئے کہا کہ آپ قوم کے ہونہار کھلاڑی ہیں اور آپ کا ٹیلنٹ ضائع نہی ہونے دیں گے،انہوں نے فٹبالر کو کھیل جاری رکھنے اور فٹبال کے فروغ کے لیے فعال کردار ادا کرنے کی تلقین کی۔
وزیراعظم نے محمد ریاض کو انکی پسند کے وفاقی ادارے میں ملازمت دینے کی بھی ہدایت کی جبکہ ملک کے مایہ ناز کھلاڑیوں کو ان کی صلاحیتوں کے مطابق سرکاری اداروں میں ملازمتیں دینے کے احکامات بھی جاری کئے۔
محمد شہباز شریف نے ملک میں کھیلوں کے فروغ کے لیےاقدامات تیز کرنے،بین الاقوامی سطح پر ملک کی نمائندگی کرنے والے کھلاڑیوں کی بہبود اور انہیں روزگار کے پائیدار مواقع فراہم کرنے کے لیے حکمت عملی تشکیل دینے کی ہدایت کی۔
محمد ریاض نے مالی تعاون اور کھلاڑیوں کے فلاح و بہبود اور کھیلوں کی ترویج کے لئے اقدامات پر وزیراعظم شہباز شریف کا شکریہ ادا کیا۔
DATE . Mar/15/2025
