اسلام آباد-وزیر اعظم سے یورپی یونین کی سفیر ڈاکٹر رینا کیونکا نے وزیر اعظم ہاؤس میں ملاقات کی، دونوں رہنماؤں نے انسانی حقوق سمیت پاکستان اور یورپی یونین کے تعلقات کے مختلف پہلوؤں پر تبادلہ خیال کیا۔
وزیراعظم نے بلوچستان میں جعفر ایکسپریس ٹرین پر حالیہ دہشت گردانہ حملے کی اظہار تعزیت پر یورپی یونین کی سفیر کا شکریہ ادا کیا اورملک سے دہشت گردی کی عفریت کے خاتمے کے لیے پاکستان کے پختہ عزم کا اظہار کیا۔
وزیراعظم نے پاکستان اور یورپی یونین کے درمیان دیرینہ دوستانہ تعلقات میں مثبت پیش رفت پر اطمینان کا اظہار کیا، انہوں نے یورپی یونین کے ساتھ تعاون پر مبنی شراکت داری کو مزید مضبوط بنانے کی خواہش کا اعادہ کیا۔
وزیراعظم نے مئی میں اسلام آباد میں منعقد ہونے والے پہلے پاکستانیورپی یونین کے اعلیٰ سطح بزنس فورم کے انعقاد کا خیرمقدم کرتے ہوئے تقریب کو کامیاب بنانے کیلئےمکمل تعاون اور سہولت کا یقین دلایا۔
یورپی یونین کی سفیر نے وزیر اعظم کو یورپی یونین کے وفود کے حالیہ پاکستان کے دوروں کے ساتھ ساتھ آئندہ دوروں کے بارے میں بھی آگاہ کیا۔
DATE . Mar/15/2025
