اسلام آباد-وزیراعظم کی زیر صدارت پاور ڈویژن کے امور پر اہم جائزہ اجلاس ہوا۔
اسلام آباد میں ہونے والے اجلاس میں وزیراعظم نے متعلقہ حکام کو سولرآئزیشن پالیسی کے حوالے سے عوام میں پائے جانے والے ابہام کو دور کرنے کی ہدایت کرتے ہوئے کہا کہ قابل تجدید توانائی کا فروغ حکومت کی ترجیح ہے،شمسی توانائی کے حوالے سے حکومت کی پالیسی اور ترجیحات میں کوئی تبدیلی نہیں آئی ہے۔
وزیراعظم نے بجلی تقسیم کار کمپنیوں کی نجکاری کا عمل تیز تر کرنے کی ہدایت کرتے ہوئے کہا کہ جینریشن کمپنیوں کے خاتمے کے حوالے سے تمام تر قانونی اور دیگر امور جلد از جلد طے کئے جائیں،بجلی کے نرخوں میں کمی کے حوالے سے ایک جامع اور مؤثر حکمت عملی کے تحت پیکج تیار کیا جا رہا ہے جس کا اعلان جلد کر دیا جائے گا ،پاور سیکٹر میں اصلاحات کی بدولت عوام کو بجلی کی قیمتوں میں مزید ریلیف فراہم کریں گے۔
اجلاس میں وفاقی وزیر پاور ڈویژن سردار اویس احمد لغاری ، وزیراعظم کے مشیر ڈاکٹر توقیر شاہ اور متعلقہ اعلیٰ سرکاری افسران نے شرکت کی٫ جبکہ وفاقی وزیر اقتصادی امور احد خان چیمہ اور وزیراعظم کے مشیر محمد علی بذریعہ وڈیو لنک شریک ہوئے
DATE . Mar/24/2025
