پاکستان اور عمان کا دوطرفہ تعلقات کو وسعت دینے اور سکیورٹی تعاون بڑھانے پر اتفاق

اسلام آباد، وفاقی وزیر داخلہ محسن نقوی سے عمان کے سفیر فہد سلیمان خلف الخروسی نے ملاقات کی جس میں باہمی دلچسپی کے اُمور اور دوطرفہ تعلقات پر تبادلہ خیال کیا گیا۔
ملاقات کے دوران پاکستان اور عمان کے درمیان تعلقات کو مزید وسعت دینے اور سکیورٹی تعاون بڑھانے پر اتفاق کیا گیا۔
وزیر داخلہ محسن نقوی نے کہا کہ پاکستان عمان کے ساتھ برادرانہ تعلقات کو انتہائی اہمیت دیتا ہے،دونوں ممالک کے درمیان برادرانہ تاریخی تعلقات مشترکہ عقیدے اور ثقافت پر مبنی ہیں۔
محسن نقوی نے بتایا کہ تین لاکھ سے زائد پاکستانی عمان میں مقیم ہیں اور عمان کی تعمیر و ترقی میں بھرپور کردار ادا کر رہے ہیں،کوشش ہے کہ زیادہ سے زیادہ ہنرمند افراد کو عمان بھیجا جائے۔
عمانی سفیر فہد سلیمان خلف الخروسی نے پاکستان اور عمان کے برادرانہ تعلقات کو کئی دہائیوں پر محیط قرار دیا اورعمان کی تعمیر و ترقی میں پاکستانی کمیونٹی کے کردار کو سراہا۔

DATE . Apr/11/2025