اسلام آباد-پاکستان منرلز انویسٹمنٹ فورم 2025 کا کامیاب انعقاد ملکی معدنی شعبے کی ترقی کے لیے ایک اہم سنگ میل ثابت ہوا، اس فورم میں ملکی اور غیر ملکی سرمایہ کاروں کی بڑی تعداد نے شرکت کی اور پاکستان کے معدنی وسائل میں سرمایہ کاری کے حوالے سے مثبت رائے کا اظہار کیا۔
فورم میں شریک مَڈیکس کے سی ای او ڈیو ولیمز نے پاکستان میں سرمایہ کاری میں گہری دلچسپی ظاہر کرتے ہوئے کہا کہ پاکستان میں معدنیات کے وسیع ذخائر موجود ہیں اور ان کی کمپنی ڈرلنگ آلات فراہم کرنے کے لیے تیار ہے۔
سارف کے صدر سہیل کیانی نے کہا کہ پاکستان کا جغرافیہ معدنیات کی تلاش کے لیے انتہائی موزوں ہے اور مستقبل میں تانبے کی عالمی مانگ میں اضافے کے باعث پاکستان کی معاشی ترقی کے روشن امکانات موجود ہیں۔
ویسٹ گیٹ انٹرنیشنل پرائیویٹ لمیٹڈ کے سینئر عہدیدار عبدالحمید نے فورم میں پہلی بار شرکت پر خوشی کا اظہار کیا اور کہا کہ اس طرح کے اقدامات پاکستان اور امریکہ کے تعلقات کو مزید مضبوط کریں گے،کرٹیکل منرلز فورم’کی سینئر پالیسی ایڈوائزر لیا بوئر سیف اللہ نے بھی اس فورم کو پاکستان کے لیے انتہائی سودمند قرار دیا۔
مہران یونیورسٹی کے ایسوسی ایٹ پروفیسر ڈاکٹر فہد عرفان صدیقی نے حکومت کی جانب سے میٹل مائننگ کو جدید تحقیق اور ٹیکنالوجی سے ہم آہنگ کرنے کے اقدامات کو سراہا، انہوں نے کہا کہ تھر میں کوئلے کے وسیع ذخائر موجود ہیں اور دھاتوں اور توانائی کی مائننگ کو یکجا کرنے سے پاکستان کو بہت فائدہ ہوگا، اپ رائز کموڈیٹیزکے سی ای او تبسم قادر نے بھی تھر میں سرمایہ کاری کے شاندار مواقع پر روشنی ڈالی۔
ملکی اور غیر ملکی سرمایہ کاروں اور شرکاء کا مثبت ردعمل ایس آئی ایف سی کی ان کاوشوں کا منہ بولتا ثبوت ہے جو پاکستان کے معدنی شعبے کی ترقی کے لیے کی جا رہی ہیں-
DATE . Apr/11/2025
