راولپنڈی-آرمی چیف جنرل سید عاصم منیر سے امریکی کانگریس کے وفد نے ملاقات کی ہے،امریکی کانگریس کے وفد کی قیادت جیک برگمین کر رہے تھے جب کہ تھامس سوزی اور جوناتھن جیکسن بھی ان کے ہمراہ تھے ۔
ملاقات میں باہمی دلچسپی کے ُامور پر تبادلہ خیال کیا گیا اور علاقائی سلامتی اور دفاعی تعاون پر زور دیا گیا،فریقین نے باہمی احترام، مشترکہ اقدار اور تزویراتی مفادات کی اہمیت کا اعادہ کیا۔
امریکی وفد نے دہشت گردی کے خلاف جنگ میں اہم کردار ادا کرنے پر پاکستان کی مسلح افواج کی تعریف کی اور علاقائی امن و استحکام کے لیے پاکستان کی لازوال خدمات کا اعتراف کیا ۔پاکستان کی خودمختاری کے لیے اپنے احترام کو اُجاگر کرتے ہوئے، امریکی کانگریس کے وفد نے بالخصوص سلامتی، تجارت، سرمایہ کاری اور اقتصادی ترقی کے شعبوں میں وسیع البنیاد دوطرفہ تعاون کو آگے بڑھانے کے لیے مضبوط عزم کا اظہار کیا۔
جنرل سید عاصم منیر نے پاکستان کی امریکہ کے ساتھ دیرینہ شراکت داری کو مزید گہرا اور متنوع بنانے کی خواہش کا اعادہ کیا جو باہمی طور پر فائدہ مند اور ایک دوسرے کے قومی مفادات کے احترام پر مبنی ہو ۔ ملاقات کے دوران انفارمیشن ٹیکنالوجی کے شعبے میں تربیتی تعاون کے لیے مفاہمت کی یادداشتوں پر بھی دستخط کیے گئے۔
DATE . Apr/14/2025
