اسلام آباد-وزیراعظم محمد شہباز شریف نے ملک کو پولیو سے پاک کرنے کیلئے حکومتی اوربین الاقوامی اداروں و شراکت داروں کی کاوشوں کو قابل ستائش قرار دیا ہے۔وزیرِ اعظم محمد شہباز شریف کی زیر صدارت انسداد پولیو مہم کی کارکردگی پر جائزہ اجلاس آج اسلام آباد میں منعقد ہوا۔وزیراعظم نے 21 اپریل سے شروع ہونے والی انسدادِ پولیو مہم میں پانچ برس سے کم عمر ہر بچے کو پولیو کی ویکسین پلانے کو یقینی بنانے کی ہدایت کی۔انہوں نے کہا کہ انسدادِ پولیو مہم کے حوالے سے گراس روٹ لیول تک اس کی آگاہی اور کمیونٹی موبلائیزیشن یقینی بنائی جائے۔وزیراعظم نے پولیو ورکرز کو خراج تحسین پیش کرتے ہوئے کہا کہ انسدادِ پولیو مہم میں شریک ورکرز مشکل حالات کے باوجود اس موذی مرض کے خلاف جنگ میں ہراول دستے کا کردار ادا کر رہے ہیں۔مجھ سمیت پوری قوم کو اپنے محنتی پولیو ورکرز پر فخر ہے۔وزیراعظم نے دیگر خطرناک بیماریوں کے خلاف مدافعت کیلئے معمول کی ویکسینیشن کی ملک گیر فراہمی کو سو فیصد یقینی بنانے کی بھی ہدایت کی۔اجلاس میں وزیرِ اعظم کو 21 سے 27 اپریل کو شروع ہونے والے انسدادِ پولیو مہم کے بارے بریفنگ دی گئی جس میں بتایا گیا کہ مہم میں ساڑھے 45 لاکھ بچوں کو پولیو سے بچاؤ کی ویکسین پلائی جائے گی جبکہ اس ملک گیر مہم میں 4 لاکھ 15 ہزار پولیو ورکرز حصہ لیں گے۔اجلاس کو مزید بتایا گیا کہ وزیرِ اعظم کی ہدایت پر مہم کی تھرڈ پارٹی ویلیڈیشن 28 سے 30 اپریل کو مکمل کر لی جائے گی۔ملک میں گزشتہ انسداد پولیو مہمات کے نتائج سے آگاہ کرتے ہوئے بتایا گیا کہ 10 فروری 2025 سے اب تک ملک میں ایک بھی پولیو کا کیس رپورٹ نہیں ہوا جبکہ انسداد پولیو مہمات کی کولڈ چین ٹریکنگ کو ڈیجیٹل نظام کے تحت مانیٹر کیا جارہا ہے۔اجلاس میں وفاقی وزیرِ صحت سید مصطفی کمال، وزیرِ اعظم کی پولیو کیلئے خصوصی نمائندہ عائشہ رضا فاروق سمیت متعلقہ حکام اور بین الاقوامی شراکت داروں کے نمائندوں نے شرکت کی۔
Date . Apr/18/2025
