لدھا -جنوبی وزیرستان کے عوام کے لیے ایک تاریخی پیش رفت ہوئی ہے ۔انتظامی سہولت کے لیے ضلعی ہیڈکوارٹرز کو ٹانک سے لدھا منتقل کر دیا گیا ہے۔
اس اقدام سے قبل،ضلعی دفاتر کی ٹانک میں موجودگی کے باعث مقامی لوگوں کو اپنے سرکاری کاموں کے لیے طویل اور دشوار گزار سفر کرنا پڑتا تھا جس سے انہیں شدید مشکلات کا سامنا تھا۔
ضلعی ہیڈکوارٹرز کی لدھا منتقلی کے بعد ایک اعلیٰ سطحی اجلاس منعقد ہوا جس میں کور کمانڈر پشاور لیفٹیننٹ جنرل عمر احمد بخاری اور چیف سیکریٹری خیبرپختونخوا شہاب علی شاہ سمیت اعلیٰ سول اور فوجی حکام نے شرکت کی۔
اجلاس کا بنیادی مقصد لدھا کے مقام پر قائم ہونے والے نئے ضلعی ہیڈکوارٹرز سے عوامی خدمات کی مؤثر فراہمی کے انتظامات کا جائزہ لینا تھا۔ اجلاس میں اس بات پر زور دیا گیا کہ تمام محکمے اب لدھا سے ہی فعال انداز میں کام کریں گے اور عوام کو فوری طور پر سہولیات مہیا کی جائیں گی۔
مقامی عمائدین نے اس تاریخی فیصلے کو زبردست خراج تحسین پیش کرتے ہوئے اسے وزیرستان کے لیے ترقی، استحکام اور ایک روشن مستقبل کی جانب ایک اہم قدم قرار دیا۔ ضلعی دفاتر کی لدھا منتقلی پر عوامی حلقوں نے گہرے تشکر کا اظہار کرتے ہوئے سکیورٹی فورسز اور حکومت خیبرپختونخوا کی اس اہم کاوش کو سراہا۔ عوام کا کہنا ہے کہ اس اقدام سے ان کی روزمرہ زندگی میں نمایاں آسانی پیدا ہوگی-
DATE . Apr/19/2025
