اسلام آباد-متحدہ عرب امارات کے نائب وزیراعظم دو روزہ دورے پر آج پاکستان پہنچ رہے ہیں۔اپنے دورے کے دوران شیخ عبداللہ بن زید النہیان وزیراعظم محمد شہباز شریف اور نائب وزیراعظم محمد اسحاق ڈار سے ملاقاتیں کریں گے۔ان ملاقاتوں میں دوطرفہ تعلقات کے تمام پہلوؤں کا جائزہ لیا جائے گا، باہمی دلچسپی کے تمام شعبوں میں دوطرفہ تعاون کو مضبوط بنانے کے لیے دونوں ممالک کے مشترکہ عزم کا اعادہ کیا جائے گا اور خطے میں امن و خوشحالی کے مشترکہ وژن کی توثیق کی جائے گی۔دورے کے دوران تجارت، سرمایہ کاری، توانائی کے شعبوں میں تعاون، علاقائی سلامتی اور عوامی روابط پر خصوصی توجہ دی جائے گی۔ یہ دورہ دونوں فریقین کو باہمی دلچسپی اور تشویش کی علاقائی اور عالمی پیش رفت پر تبادلہ خیال کرنے کا موقع بھی فراہم کرے گا۔ترجمان دفتر خارجہ کے مطابق یہ اعلیٰ سطحی دورہ ،پاکستان اور متحدہ عرب امارات کے درمیان گہرے برادرانہ تعلقات کی عکاسی کرتا ہے۔شیخ عبداللہ بن زاید النہیان کا دورہ پاکستان اور متحدہ عرب امارات کے دیرینہ تعلقات کو مزید مستحکم کرے گا۔نائب وزرائے اعظم کی آخری ملاقات 21 فروری 2025 کو ابوظہبی میں ہوئی تھی۔
Date . Apr/20/2025
