اسلام آباد: متحدہ عرب امارات کے نائب وزیراعظم اور وزیر خارجہ شیخ عبداللہ بن زاید النہیان دو روزہ سرکاری دورے پر اسلام آباد پہنچ گئے ہیں۔نائب وزیراعظم اور وزیر خارجہ سینیٹر محمد اسحاق ڈار نے معزز مہمان کا استقبال کیا۔شیخ عبداللہ بن زاید النہیان اپنے دورے کے دوران وزیراعظم محمد شہباز شریف اور نائب وزیراعظم اسحاق ڈار سے ملاقات کریں گے۔ اِن ملاقاتوں میں دوطرفہ تعلقات کے تمام پہلوؤں کا جائزہ لیا جائے گا، باہمی دلچسپی کے تمام شعبوں میں دوطرفہ تعاون کو مضبوط بنانے کے لیے دونوں ممالک کے مشترکہ عزم کا اعادہ کیا جائے گا اور خطے میں امن و خوشحالی کے مشترکہ وژن کی توثیق کی جائے گی۔ملاقاتوں میں باہمی تجارت، سرمایہ کاری، توانائی کے شعبے میں تعاون، علاقائی سلامتی، اور دونوں ممالک کے عوام کے درمیان رابطوں کے فروغ پر تبادلہ خیال کیا جائےگا۔
Date . Apr/21/2025
