منامہ: وفاقی وزیرِ داخلہ محسن نقوی نے ایک روزہ سرکاری دورے پر بحرین کے دارالحکومت منامہ کا دورہ کیا، جہاں انہوں نے اپنے بحرینی ہم منصب کے ساتھ ملاقات کی اور سکیورٹی تعاون کو مزید فروغ دینے پر تبادلہ خیال کیا۔
بحرین انٹرنیشنل ائیرپورٹ پر بحرین کے وزیرِ داخلہ جنرل شیخ راشد بن عبداللہ الخلفیہ نے محسن نقوی کا شاندار استقبال کیا۔ بعد ازاں، بحرینی وزارتِ داخلہ کے ہیڈ کوارٹر “منامہ فورٹ” آمد پر محسن نقوی کو گارڈ آف آنر پیش کیا گیا۔
وزیرِ داخلہ محسن نقوی کی اپنے بحرینی ہم منصب سے اہم ملاقات ہوئی جس میں باہمی دلچسپی کے امور اور سکیورٹی تعاون پر تفصیلی تبادلہ خیال کیا گیا۔ دونوں وزراء نے سکیورٹی تعاون کو مزید بڑھانے کی ضرورت پر زور دیا۔ ملاقات میں انسدادِ دہشت گردی، انسدادِ انسانی سمگلنگ اور انسدادِ منشیات کے حوالے سے دوطرفہ اشتراکِ کار پر بات چیت ہوئی۔
انہوں نے سکیورٹی تعاون کو فروغ دینے، علاقائی و عالمی چیلنجز سے نمٹنے اور بحرین-پاکستان مشترکہ سکیورٹی کمیٹی کے کام کو مزید موثر بنانے پر بھی تبادلہ خیال کیا۔
بحرین کے وزیرِ داخلہ نے پاکستان اور بحرین کے درمیان سکیورٹی سمیت دیگر شعبوں میں تعاون اور ہم آہنگی کو سراہا۔ انہوں نے کہا کہ محسن نقوی کا یہ دورہ بحرین اور پاکستان کے درمیان مضبوط تعلقات پر مبنی سکیورٹی روابط کو مستحکم کرنے کا موقع ہے۔ انہوں نے مزید کہا کہ “ہم پاکستان کیساتھ سکیورٹی تعاون و کوآرڈینیشن کو قدر کی نگاہ سے دیکھتے ہیں۔”
محسن نقوی نے بحرینی ہم منصب کا شکریہ ادا کرتے ہوئے کہا کہ بحرین کی وزارتِ داخلہ اور پاکستانی وزارتِ داخلہ کے درمیان انسدادِ منشیات و انسدادِ انسانی سمگلنگ کے لیے تعاون بڑھانا وقت کی ضرورت ہے۔ انہوں نے بحرینی وزیرِ داخلہ کو پاکستان کے دورے کی دعوت بھی دی۔
اس موقع پر وزیرِ داخلہ محسن نقوی نے بحرینی وزارتِ داخلہ میں رکھی کتاب میں اپنے تاثرات درج کیے۔ اس موقع پر بحرین کے نائب وزیرِ داخلہ میجر جنرل عادل بن خلفیہ بن حماد، چیف آف پبلک سکیورٹی، سینئر عسکری افسران، بحرین میں پاکستان کے سفیر ثاقب روف، ڈپٹی ہیڈ آف مشن اور اعلیٰ سفارتی حکام بھی موجود تھے۔
DATE . July/13/2025
