جنرل ساحر شمشاد مرزا سے تاجکستان کے چیف آف جنرل اسٹاف کی ملاقات،خطے کی بدلتی ہوئی سیکیورٹی صورتحال ، باہمی اسٹریٹجک مفادات پر گفتگو

راولپنڈی:تاجکستان کی مسلح افواج کے چیف آف جنرل اسٹاف اور نائب وزیرِ دفاع، میجر جنرل سیدزودا بوبوجون عبدالقادر نے چیئرمین جوائنٹ چیفس آف اسٹاف کمیٹی جنرل ساحر شمشاد مرزاسے جوائنٹ اسٹاف ہیڈکوارٹرز راولپنڈی میں ملاقات کی۔

آئی ایس پی آر کے مطابق ملاقات میں خطے کی بدلتی ہوئی سیکیورٹی صورتحال اور باہمی اسٹریٹجک مفادات پر تبادلہ خیال کیا گیا۔ دونوں عسکری قائدین نے پاکستان اور تاجکستان کے درمیان گہرے برادرانہ تعلقات پر زور دیا اور دو طرفہ دفاعی تعاون کو مزید فروغ دینے کے امکانات کا جائزہ لیا۔
آئی ایس پی آر کاکہناہے کہ معزز مہمان نے پاک افواج کی پیشہ ورانہ صلاحیتوں کو سراہا اور دہشت گردی کے خلاف جنگ میں ان کی قربانیوں کو خراجِ تحسین پیش کیا۔

قبل ازیں جوائنٹ اسٹاف ہیڈکوارٹرز پہنچنے پر معزز مہمان کو تینوں مسلح افواج کے ایک چاق و چوبند دستے نے گارڈ آف آنر پیش کیا-

DATE . July/26/2025