راولپنڈی: چیئرمین جوائنٹ چیفس آف اسٹاف کمیٹی (CJCSC) جنرل ساحر شمشاد مرزا (نشانِ امتیاز ملٹری) نے دفاع اور سلامتی سے متعلق مذاکرات کے تیسرے مرحلے میں شرکت کے لیے مصر کا سرکاری دورہ کیا۔
آئی ایس پی آر کے مطابق دورے کے دوران جنرل ساحر شمشاد مرزا نے مصر کےصدر عبدالفتاح السیسی، وزیر دفاع اور کمانڈر انچیف مصری مسلح افواج جنرل عبدالمجید احمد سقر، چیئرمین و منیجنگ ڈائریکٹر سویز کینال اتھارٹی ایڈمرل اسامہ مونیر محمد ربیع اور جامعہ الازہر کے امامِ اکبر پروفیسر ڈاکٹر احمد محمد احمد الطیب سے علیحدہ علیحدہ ملاقاتیں کیں۔
آئی ایس پی آر کاکہناہے کہ ان ملاقاتوں میں دوطرفہ عسکری تعاون، سلامتی، انسداد دہشت گردی اور موجودہ علاقائی صورتحال پر تفصیلی تبادلہ خیال کیا گیا۔ دونوں جانب سے تربیت، مشترکہ مشقوں اور دفاعی تعاون کے شعبوں میں موجودہ عسکری تعلقات کو مزید وسعت دینے اور مضبوط بنانے پر زور دیا گیا۔
جامعہ الازہر کے پروفیسر امامِ اکبر ڈاکٹر احمد الطیب سے ملاقات کے دوران چیئرمین ”سی جے سی ایس سی”جنرل ساحر شمشاد مرزا نے بین المذاہب ہم آہنگی، برداشت اور شمولیت کے فروغ پر زور دیا اور دہشت گردی کی بنیادی وجوہات سے نمٹنے کے لیے مذہبی اور بین المذاہب ہم آہنگی کی اہمیت پر روشنی ڈالی۔
مصری قیادت نے پاک افواج کی پیشہ ورانہ صلاحیتوں کو سراہا اور دہشت گردی کے خلاف ان کی قربانیوں کا اعتراف کیا۔
اس سے قبل وزارتِ دفاع پہنچنے پر چیئرمین جوائنٹ چیفس آف اسٹاف کمیٹی کو مصری افواج کے چاق و چوبند دستے کی جانب سے گارڈ آف آنر پیش کیا گیا۔
DATE . Aug/1/2025
