بیجنگ: چین نے کچھ امریکی اداروں پر عائد برآمدی پابندیاں معطل کرنے کا اعلان کیا ہے۔ سرکاری خبر رساں ایجنسی شنہوا کے مطابق، چین کی وزارتِ تجارت نے بتایا کہ یہ اقدام چین اور امریکہ کے درمیان اسٹاک ہوم میں ہونے والے اعلیٰ سطحی اقتصادی و تجارتی اجلاس میں طے پانے والے اتفاقِ رائے کے تحت کیا گیا ہے۔
وزارت کے مطابق چین نے 4 اور 9 اپریل 2025 کو 28 امریکی اداروں کو برآمدی کنٹرول کی فہرست میں شامل کیا تھا، جس کے تحت ان پر دوہری استعمال کی اشیاء کی برآمد پر پابندی عائد کی گئی تھی۔ بعد ازاں، 14 مئی کو ان اداروں پر عائد اقدامات کو 90 دن کے لیے معطل کیا گیا۔
تازہ بیان میں کہا گیا ہے کہ فہرست میں 4 اپریل کو شامل کیے گئے 16 اداروں کے لیے معطلی کی مدت مزید 90 دن بڑھا دی گئی ہے، جبکہ 9 اپریل کو شامل کیے گئے 12 اداروں کے خلاف برآمدی کنٹرول مکمل طور پر ختم کر دیا گیا ہے۔
وزارت نے واضح کیا ہے کہ ایسے برآمد کنندگان جو ان اداروں کو دوہری استعمال کی اشیاء فراہم کرنا چاہتے ہیں انہیں متعلقہ قوانین و ضوابط کے مطابق وزارت سے پیشگی اجازت لینا ہو گی۔ وزارت تمام درخواستوں کو قانون کے مطابق جانچ کر فیصلہ کرے گی-
DATE . Aug/12/2025
