اسلام آباد:وفاقی وزیر داخلہ محسن نقوی اور وزیر مملکت داخلہ طلال چوہدری نے پارلیمنٹ لاجز کے زیر تعمیر نئے بلاک کا دورہ کیا۔ وفاقیوزیر داخلہ محسن نقوی نے زیر تعمیر بلاک پر جاری تعمیراتی کام کا معائنہ کیا اور پارلیمنٹ لاجز کے نئے بلاک کو 4 ماہ میں مکمل کرنے کی ہدایت کی۔ وزیر داخلہ محسن نقوی نے بتایا کہ پارلیمنٹ لاجز کے نئے بلاک کی تعمیر کیلئے فنڈز کی منظوری دی گئی ہے۔
یہ منصوبہ 13 سال سے التواء کا شکار رہا۔منصوبے کے تعمیراتی کام کا آغاز کر دیا گیا ہے اور اسے ہنگامی بنیادوں پر مکمل کیا جائے گا۔ نئے بلاک کی تکمیل سے تمام پارلیمنٹرینز کو رہائش کی سہولت فراہم کی جا سکے گی۔
چیئرمین سی ڈی اے محمد علی رندھاوا نے وزیر داخلہ کو منصوبے کے متعلق بریفنگ دیتے ہوئے بتایا کہ 2012میں منصوبے کا ٹھیکہ دیا گیا جسے 2013 میں مکمل ہونا تھا،منصوبے کو 2014 تک ایکسٹینشن دی گئی،کنٹریکٹر نے کام روک دیا اور قانونی پیچیدگیوں کی وجہ سے منصوبہ تاخیر کا شکار رہا۔
بریفنگ میں مزید بتایا گیاکہ پارلیمنٹ لاجز کا نیا بلاک کل 104یونٹس پر مشتمل ہے۔وفاقی سیکرٹری داخلہ خرم آغا، چئیرمین سی ڈی اے محمد علی رندھاوا، ڈپٹی کمشنر اسلام آباد عرفان میمن اور دیگر حکام بھی اس موقع پر موجود تھے۔
DATE . Oct/5/2025
