ممبئی: بھارت کی سینیئر اداکارہ اور لیجنڈری فلم ساز وی شانتارام کی اہلیہ سندھیا شانتارام 87 برس کی عمر میں انتقال کرگئیں۔
بھارتی میڈیا کے مطابق اداکارہ سندھیا شانتارام جمعہ کی شام ممبئی میں اس دنیا سے رخصت ہوئیں۔ ان کی آخری رسومات ہفتے کو ادا کی گئیں۔
سندھیا شانتارام نے 1950، 60 اور 70 کی دہائی میں اپنی اداکاری کے ساتھ رقص میں مہارت کی وجہ سے شہرت حاصل کی ۔
انہوں نے ہندی اور مراٹھی فلموں میں اداکاری کی جبکہ اپنے رقص کی صلاحیتوں کے باعث ناظرین کے دلوں میں جگہ بنائی۔
سندھیا کی مشہور ترین فلموں میں 1955 کی ‘جھنک جھنک پائل بجے’ اور 1957 کی فلم ‘2 آنکھیں 12 ہاتھ’ وغیرہ شامل ہیں۔
اس کے علاوہ 1959 میں ریلیز ہونے والی فلم “نوورنگ ” میں ان کی شاندار کارکردگی نے سب کو متاثر کیا۔
مہاراشٹراکے وزیرِ ثقافتی امور نے ایکس پر اداکارہ کے انتقال کی خبر دیتے ہوئے تعزیت کا اظہار کیا۔
سندھیا کے انتقال پر شوبز انڈسٹری کی جانب سے گہرے دکھ کا اظہارکیا گیا۔
DATE . Oct/5/2025
