کراچی: خصوصی سرمایہ کاری سہولت کونسل کے تعاون سے 22ویں ہیلتھ ایشیا انٹرنیشنل نمائش 23 سے 25 اکتوبر 2025 تک کراچی ایکسپو سینٹر میں منعقد کی جائے گی۔ اس ایونٹ کا انعقاد ای کامرس گیٹ وے پاکستان اور وزارتِ صحت پاکستان کی مشترکہ کاوشوں سے کیا جا رہا ہے۔
نمائش میں 24 ممالک کے وفود کی شرکت متوقع ہے، جن میں چین، روس، ایران، برطانیہ، ترکی اور ہنگری شامل ہیں۔ تین روزہ ایونٹ سے 150 ملین امریکی ڈالر کے کاروباری حجم کی امید کی جا رہی ہے۔
ایکسپو میں “مستقبل کے ہسپتال و صحت کی نگہداشت” اور “ڈیجیٹل ہیلتھ” جیسے اہم موضوعات پر خصوصی کانفرنسز کا انعقاد کیا جائے گا، جس کا مقصد پاکستان میں صحت کے شعبے کی ڈیجیٹلائزیشن اور جدید ٹیکنالوجی کے فروغ کو ممکن بنانا ہے۔
ایونٹ ڈائریکٹر فرحان انیس کے مطابق، یہ نمائش پاکستان میں صحت کی سہولیات کو بہتر بنانے، ٹیکنالوجی کے ذریعے مریضوں کا بوجھ کم کرنے، اور ایک مؤثر پلیٹ فارم فراہم کرنے میں مددگار ثابت ہو گی۔
ایس آئی ایف سی کی معاونت سے منعقدہ یہ ایونٹ پاکستان کے صحت کے شعبے میں ترقی اور عالمی سرمایہ کاری کے مواقع کے لیے ایک اہم سنگ میل کی حیثیت رکھتا ہے۔
DATE . Oct/21/2025
