لاہور:وزیراعلیٰ پنجاب مریم نواز شریف نے باسکٹ بال کے عالمی دن کے موقع پر کھیلوں کے فروغ کے حوالے سے اہم پیغام دیا۔ انہوں نے کہا کہ باسکٹ بال سمیت دیگر کھیلوں کے فروغ کے لیے حکومت پختہ عزم رکھتی ہے۔
35ویں نیشنل گیمز میں 37 سال بعد پنجاب کی شاندار فتح پر 126 میڈلز قابلِ تحسین ہیں۔ مریم نواز شریف نے بتایا کہ پنجاب میں عالمی معیار کے اسپورٹس کمپلیکس تعمیر کیے جا رہے ہیں اور کھلاڑیوں کی معاونت کے لیے اسپورٹس انڈوومنٹ فنڈ کے ذریعے سہولیات فراہم کی جائیں گی۔
وزیراعلیٰ نے کہا کہ نوجوانوں میں ٹیم ورک، مسابقت اور برداشت پیدا کرنے کے لیے کھیل اہم کردار ادا کرتے ہیں اور کھیل ہمیں نظم و ضبط بھی سکھاتے ہیں۔ کھیلوں کے فروغ کے لیے ”کھیلتا پنجاب” پروگرام شروع کیا گیا ہے۔ پنجاب بھر میں گراؤنڈز اور جمنیزیم کی تعمیر و بحالی کے لیے شعبہ تعمیر و بحالی قائم کیا جا رہا ہے۔
مریم نواز شریف نے مزید بتایا کہ نوجوانوں کے لیے 300 گراؤنڈز اور اسپورٹس کمپلیکس بنانے کے لیے پرعزم ہیں اور اسپورٹس انڈوومنٹ فنڈ بڑھا کر 2 سے 4 ارب روپے کر دیا گیا ہے۔ سپورٹس فیسٹیول بحال کیے جائیں گے اور ہر یونین کونسل میں کھیلوں کے مقابلے اور پنجاب لیگ کا آغاز کیا جائے گا۔ سپورٹس ایڈوائزری کونسل میں 10 یونیورسٹی کے طلبہ بھی شامل ہوں گے اور کھلاڑیوں کی ٹریننگ کے لیے بین الاقوامی کوچز بھی لائیں جائیں گے۔
DATE . Dec/21/2025
