نواب شاہ: پاکستان کی لوک موسیقی اور مقامی ساز الغوزہ کے فنکار مصری خان جمالی کی 45ویں برسی آج منائی جا رہی ہے۔
مصری خان جمالی 1921ء میں سندھ کے شہر جیکب آباد کے علاقے روجھان جمالی میں پیدا ہوئے۔ ابتدائی زندگی میں انہوں نے نواب شاہ میں آلاتِ موسیقی بنانے کا کام شروع کیا، مگر جلد ہی الغوزہ کے فن میں مہارت حاصل کر کے قومی اور بین الاقوامی سطح پر شہرت حاصل کی۔
ریڈیو پاکستان نے تین دہائیوں تک ان کے پروگرام نشر کیے اور بعد ازاں ٹیلی ویژن پر بھی ان کے فن کو پیش کرنے کا موقع ملا۔ الغوزہ کے ذریعے ان کی دھنیں دلوں کو محظوظ کرتی تھیں اور پاکستان کی لوک موسیقی کی روایت کو زندہ رکھتی تھیں۔1979ء میں حکومتِ پاکستان نے ان کی فنی خدمات کے اعتراف میں انہیں صدارتی تمغہ برائے حسنِ کارکردگی سے نوازا۔
مصری خان جمالی 1980ء میں وفات پا گئے اور نواب شاہ کے حاجی نصیر قبرستان میں سپردِ خاک ہوئے۔ آج بھی ان کی یاد مقامی اور بین الاقوامی سطح پر لوک موسیقی کے شائقین میں زندہ ہے، اور الغوزہ کی دھنیں ان کی فنی میراث کی یاد دلاتی ہیں۔
DATE . Nov/14/2025
