اسلام آباد: قومی اسمبلی سیکرٹریٹ کے ترجمان نے واضح کیا ہے کہ ہفتہ کی رات اسپیکر قومی اسمبلی جناب سردار ایاز صادق کی جانب سے امریکی اراکینِ کانگریس کے وفد کے اعزاز میں ایک عشائیہ کا اہتمام کیا گیا تھا۔
اس عشائیے میں تمام متعلقہ پارلیمانی رہنماؤں کو مدعو کیا گیا تھا تاکہ باہمی تعلقات کو فروغ دیا جا سکے اور بین الپارلیمانی روابط کو مضبوط بنایا جا سکے۔
ترجمان کے مطابق، سپیکر قومی اسمبلی کے پرنسپل سیکرٹری، اسپیشل سیکرٹری برائے بین الاقوامی روابط (آئی آر) اور ڈائریکٹر جنرل پروٹوکول نے پاکستان تحریک انصاف کے رہنماؤں، بیرسٹر گوہر علی خان اور ملک عامر ڈوگر سے باقاعدہ رابطہ کیا اور انھیں عشائیے میں شرکت کی دعوت دی۔
ترجمان نے مزید وضاحت کی کہ دونوں معزز اراکین نے سپیکر کی جانب سے دی گئی دعوت قبول کی اور اپنی شرکت کی باقاعدہ تصدیق بھی کی تھی۔
تاہم بعد ازاں وہ عشائیے اور امریکی وفد سے ملاقات میں شریک نہیں ہوئے۔
ترجمان نے ان بیانات کو حقائق کے منافی قرار دیا جن میں یہ دعویٰ کیا گیا کہ پاکستان تحریک انصاف کے رہنماؤں کو عشائیے میں مدعو ہی نہیں کیا گیا تھا۔
ترجمان نے واضح کیا کہ مذکورہ بیانات حقائق کے منافی ہیں ۔
DATE . Apr/16/2025
