گوجرانوالہ (نمائندہ خصوصی) – ڈائریکٹر جنرل ایف آئی اے پاکستان رفعت مختار راجہ کی خصوصی ہدایت پر گوجرانوالہ زون میں انسانی اسمگلروں کے خلاف کریک ڈاؤن میں تیزی آ گئی ہے۔ زون کے تمام اضلاع منڈی بہاؤالدین، گجرات، گوجرانوالہ، سیالکوٹ اور نارووال میں اسمگلرز کے گرد گھیرا مزید تنگ کر دیا گیا ہے۔
ایف آئی اے گجرات سرکل کے ڈپٹی ڈائریکٹر بلال طارق کی قیادت میں ایف آئی اے کی ٹیم نے کامیاب کارروائی کرتے ہوئے منڈی بہاؤالدین میں چھاپہ مار کر بدنام زمانہ انسانی اسمگلر گلزار کو گرفتار کر لیا۔ گرفتار ملزم کو ایف آئی اے تھانہ گجرات منتقل کر کے تفتیش کا آغاز کر دیا گیا ہے۔
ترجمان ایف آئی اے کے مطابق، ملزم گلزار منڈی بہاؤالدین کے گاؤں پنڈی لالہ کے رہائشی نوجوان ارسلان ارشد سے سپین بھجوانے کے بہانے 45 لاکھ روپے بٹور چکا ہے۔ گلزار نوجوانوں کو یورپ کے سنہرے خواب دکھا کر لاکھوں روپے بٹورنے کے بعد غائب ہو جاتا تھا۔ ملزم مقدمہ نمبر 120/25 میں ایف آئی اے کو مطلوب تھا.
DATE . Apr/24/2025
