اسلام آباد:وفاقی کابینہ کی اقتصادی رابطہ کمیٹی (ای سی سی) نے سکیورٹی، دفاعی منصوبوں اور ساختی اصلاحات کے لیے اہم گرانٹس کی منظوری دے دی۔
وفاقی کابینہ کی اقتصادی رابطہ کمیٹی (ای سی سی) کا اجلاس آج فنانس ڈویژن میں وفاقی وزیر برائے خزانہ و محصولات سینیٹر محمد اورنگزیب کی زیرِ صدارت منعقد ہوا، جس میں قومی سلامتی، دفاع، غذائی تحفظ اور پٹرولیم سیکٹر کی اصلاحات سے متعلق مختلف سمریوں پر غور کیا گیا۔
ای سی سی نے وزارتِ داخلہ و نارکوٹکس کنٹرول کی درخواست پر وفاقی سول آرمڈ فورسز کے زیرِ استعمال دفاعی آلات کی مرمت و دیکھ بھال کے لیے 100.3 ملین روپے کی ٹیکنیکل سپلیمنٹری گرانٹ (TSG) کی منظوری دی۔
وزارتِ داخلہ و نارکوٹکس کنٹرول کی ایک اور سمری پر کمیٹی نے سرحدی نگرانی، داخلی سلامتی اور قانون و نظم کی بحالی کے لیے وفاقی سول آرمڈ فورسز کی معاونت کے لیے 841.56 ملین روپے کی اضافی TSG کی منظوری دی۔
کمیٹی نے ڈیفنس ڈویژن کی پیش کردہ سمری کا بھی جائزہ لیا اور دفاعی خدمات کے منظور شدہ مختلف منصوبوں کے لیے 50 ارب روپے کی TSG کی منظوری دے دی۔
ای سی سی نے وزارتِ قومی غذائی تحفظ و تحقیق کی PASSCO کے خاتمے اور ایک اسپیشل پرپز وہیکل (SPV) کے قیام سے متعلق سمری پر بھی غور کیا۔ کمیٹی نے SPV کے قیام کی منظوری دیتے ہوئے اس کا ابتدائی پیڈ اَپ سرمایہ 1,000,000 روپے مقرر کیا اور ادارے کے مرحلہ وار خاتمے کی ضروریات کے مطابق مجاز سرمایہ میں کمی کی منظوری بھی دی۔
اس کے علاوہ ای سی سی نے وزارتِ پٹرولیم کی جانب سے آف شور تیل و گیس تلاش کے بلاکس کے لائسنس کی مدت میں توسیع اور ورکنگ انٹرسٹ کی منتقلی سے متعلق سمری پر غور کیا۔ کمیٹی نے غیر ملکی کمپنیوں کی پاکستان کے پٹرولیم ایکسپلوریشن سیکٹر میں زیادہ حصہ داری اور سہولت کاری کے لیے پیش کی گئی تجاویز کی منظوری دے دی۔
اجلاس میں وفاقی وزیر برائے پٹرولیم علی پرویز ملک، وفاقی وزیر برائے منصوبہ بندی و ترقی احسن اقبال، وزیرِاعظم کے مشیر ہارون اختر خان، متعلقہ وزارتوں، ڈویژنز اور ریگولیٹری اداروں کے وفاقی سیکرٹریز اور سینئر حکام نے شرکت کی۔
DATE . Nov/19/2025
