واشنگٹن:امریکہ میں پاکستانی سفیررضوان سعید شیخ نے کہا ہے کہ پاکستان نے صبر و تحمل کا مظاہرہ کرتے ہوئے اپنے دفاع کا حق استعمال کیا ہے۔یہ سوچ تک نہیں آنی چاہیے تھی کہ پاکستان پر حملہ ہوگا اور پاکستان کی جانب سے جوابی ردعمل نہیں ہو گا۔
پاکستانی سفیر نے سی این این کو انٹرویو میں پاکستان کے بھارتی الزامات اور جارحیت کے جواب میں پاکستانی نکتہ نظر اور قوم کے جذبات کی بھرپورترجمان کی اورکہا کہ ہم کشیدگی نہیں چاہتے تاہم جارحیت کا بھرپور جواب دیا جائے گا۔
رضوان سعید شیخ نے کہا کہ پہلگام واقعے کے بعد بغیر کسی ثبوت جارحیت کا مظاہرہ قابلِ مذمت جبکہ الزام تراشی انتہائی مضحکہ خیز ہے۔پاکستانی سفیرنے کہا کہ بھارت نے اشتعال انگیزی کا مظاہرہ کرتے ہوئے شہریوں، خواتین اور بچوں کو نشانہ بنایا ،کرکٹ سٹیڈیم میں کونسا دہشت گردوں کامرکزتھا جس کو نشانہ بنایاگیا۔انہوں نے کہا کہ بھارت کی جانب سے خطے میں جو کچھ کیا جاتا رہا ہے اس سے تسلط پسندانہ روئیے کی عکاسی ہوتی ہے۔
DATE . May/9/2025
