لاہور: وزیراعلیٰ پنجاب مریم نواز شریف نے امن اور ترقی کے لیے سائنس کے عالمی دن کے موقع پر اپنے پیغام میں کہا ہے کہ عوام کی خوشحالی، امن و سکون اور پائیدار مستقبل کے لیے سائنس ہی راستہ بناتی ہے۔ یہ دن روزمرہ زندگی میں سائنس کی اہمیت اجاگر کرنے اور عوامی شعور بیدار کرنے کے لیے منایا جاتا ہے۔
وزیراعلیٰ مریم نواز شریف نے کہا کہ نوجوان نسل کو امن اور ترقی کے لیے سائنسی تحقیق اور جدید ٹیکنالوجی سے آگاہ رہنا ہوگا۔ حکومت پنجاب نوجوانوں، خصوصاً طلبہ کو سائنسی ریسرچ سے استفادہ کی ترغیب دینے کے لیے عملی اقدامات کر رہی ہے۔
انہوں نے کہا کہ انفارمیشن ٹیکنالوجی، انجینئرنگ اور سائنسی علوم کے مواقع فراہم کرنا حکومت پنجاب کی اولین ترجیح ہے۔ نواز شریف آئی ٹی سٹی سائنس و ٹیکنالوجی کی انقلاب آفریں نوید ہے، جبکہ نواز شریف کینسر انسٹی ٹیوٹ اینڈ ریسرچ سینٹر اور مریم نواز آٹزم سکول اینڈ ریسرچ سینٹر میں جدید سائنٹیفک ریسرچ کو فروغ دیا جائے گا۔
وزیراعلیٰ نے مزید کہا کہ نواز شریف میڈیکل سٹی میں میڈیکل سائنس ریسرچ پر خصوصی توجہ دی جائے گی۔ پنجاب میں پہلی مرتبہ سرکاری اسکولوں میں منفرد سائنس اینڈ ٹیکنالوجی شو منعقد کیا گیا، جہاں جشن STEAM میں طلبہ نے جدید ترین ماڈلز پیش کیے۔
راجن پور کے ایک طالبعلم نے وائی فائی سے سو گنا تیز لائی فائی کا ماڈل پیش کر کے سب کو حیران کر دیا۔ مریم نواز شریف نے کہا کہ سائنس اور ٹیکنالوجی میں پیش رفت امن و سلامتی کے فروغ کے لیے ناگزیر ہے، کیونکہ ترقی اور امن کا راز انہی میں پنہاں ہے۔
انہوں نے کہا کہ حکومت پنجاب تعلیم، صحت اور زراعت سمیت ہر شعبے کو جدید سائنسی خطوط پر استوار کر رہی ہے۔ وزیراعلیٰ نے نوجوانوں کو پیغام دیا کہ وہ ٹیکنالوجی اور سائنسی علوم میں اپنی بھرپور صلاحیتوں کا مظاہرہ کریں، حکومت ان کا بھرپور ساتھ دے گی۔
مریم نواز شریف نے کہا کہ پنجاب اب آئی ٹی اور سلیکون کے انقلابی دور میں داخل ہو چکا ہے، جو ترقی و خوشحالی کے نئے دروازے کھولے گا۔
DATE . Nov/10/2025
