اسلام آباد (سٹاف رپورٹر) – وزیرِ اعظم محمد شہباز شریف کی زیر صدارت آج اسلام آباد میں ملکی معیشت کی ڈیجیٹائیزیشن سے متعلق ایک اہم جائزہ اجلاس منعقد ہوا، جس میں فیصلہ کیا گیا کہ ملکی معیشت کو مکمل طور پر ڈیجیٹل نظام پر منتقل کیا جائے گا۔ اس مقصد کے لیے وزیرِ اعظم نے متعلقہ وزارتوں اور اداروں کو فوری ٹاسک سونپ دیے ہیں۔وزیرِ اعظم نے اجلاس سے خطاب کرتے ہوئے کہا کہ غیر رسمی معیشت کا خاتمہ اور شفاف مالیاتی نظام کا قیام حکومت کی اصلاحاتی ایجنڈے کا اہم ترین حصہ ہے۔ انہوں نے کہا کہ اصلاحات کو ادارہ جاتی سطح پر مربوط انداز میں نافذ کیا جا رہا ہے تاکہ تبدیلی پائیدار اور دیر پا ہو۔وزیرِ اعظم نے ملکی معیشت کی ڈیجیٹائیزیشن کے لیے ایک متحرک ورکنگ گروپ فی الفور قائم کرنے کی ہدایت دی، جو ان اصلاحات کے نفاذ اور نگرانی کا عمل سرانجام دے گا۔ انہوں نے رمضان پیکیج کی ڈیجیٹل ترسیل کے نظام کو سراہتے ہوئے ہدایت کی کہ اس کامیاب ماڈل کو دیگر شعبوں میں بھی وسعت دی جائے۔اجلاس کو بتایا گیا کہ وزیرِ اعظم کی ہدایات کے تحت رمضان پیکیج کو مکمل طور پر ڈیجیٹل طریقے سے مستحقین تک پہنچایا گیا۔ اس موقع پر جاری اقدامات اور مستقبل کے منصوبوں سے متعلق تفصیلی بریفنگ بھی دی گئی۔اجلاس کو بتایا گیا کہ اسلام آباد میں آئی سی ٹی ایپلی کیشن کا اجرا کیا جا چکا ہے جس میں 150 سے زائد سرکاری خدمات ڈیجیٹل طور پر میسر ہیں۔ مزید بتایا گیا کہ ’راست‘ گیٹ وے کے ذریعے ادائیگیوں میں نمایاں اضافہ ہوا ہے، اور اس کا استعمال روزمرہ لین دین میں مزید بڑھانے کے لیے اسٹیٹ بینک کے تعاون سے اقدامات تیز کیے جا رہے ہیں۔اجلاس میں حکومت کے 5 نکاتی لائحہ عمل پر بھی روشنی ڈالی گئی، جس میں ڈیجیٹل ادائیگیوں کی وصولی کو یقینی بنانے، نقدی کے مقابلے میں ڈیجیٹل ادائیگیوں کی حوصلہ افزائی، حکومتی ادائیگیوں کی مکمل ڈیجیٹائیزیشن، عوامی آگاہی مہم اور ڈیٹا مانیٹرنگ جیسے اقدامات شامل ہیں۔اجلاس کو یہ بھی بتایا گیا کہ وفاقی حکومت کی تمام تر سرکاری ادائیگیاں بشمول تنخواہیں اور بلز اب ڈیجیٹل نظام کے تحت ادا کی جا رہی ہیں۔اجلاس میں وفاقی وزراء احد خان چیمہ، علی پرویز ملک، شزہ فاطمہ خواجہ، وزیرِ مملکت بلال اظہر کیانی، گورنر اسٹیٹ بینک جمیل احمد اور دیگر اعلیٰ حکام نے شرکت کی۔
Date . Apr/17/2025
