بھارت کے بہار کے گوپال گنج میں خونخوار بھیڑیے نے خوف و ہراس پھیلا دیا، ضلع کے محمد پور تھانہ علاقہ کے کاشی ٹینگراہی گاؤں میں ایک گھر سے 9 ماہ کی بچی لاپتہ ہوگئی۔
بین الاقوامی خبر رساں ادارے کی رپورٹ کے مطابق بچی کی تلاش کے دوران خون کے دھبے نظر آئے تو گاؤں کے لوگوں کو شک ہوا کہ بچی کو خونخوار بھیڑیے نے اُٹھا لیا ہوگا۔
رپورٹس کے مطابق اطلاع ملنے پر ڈاگ اسکواڈ اور ایف ایس ایل کی ٹیم نے پورے معاملے کی تحقیقات کا آغاز کیا اور تلاش کے دوران کھیت سے بچی کی مسخ شدہ لاش برآمد ہوئی۔
بھارتی میڈیا کے مطابق مدھو کماری نے اتوار کی صبح اپنی 9 ماہ کی بچی کو گھر کے آنگن میں سلایا تھا۔ اسی دوران بھیڑیا گھر میں داخل ہو کر بچی کو لے کر فرار ہوگیا۔
واقعہ کے بعد گاؤں میں خوف و ہراس کا ماحول ہے اور لوگ شام ہوتے ہی اپنے گھروں میں چلے جاتے ہیں، بھیڑیے کے حملے کی اطلاع پیر کو محکمہ جنگلات کو دی گئی، جس کے بعد سے ٹیم نے اس بھیڑیے کی تلاش شروع کردی ہے۔
ڈی ایف او میگھا یادو نے کہا کہ اطلاع ملی ہے کہ بھیڑیے نے بچی کو اُٹھالیا ہے، محکمہ جنگلات کی ٹیم موقع پر پہنچ کر تحقیقات کر رہی ہے۔ جانچ کے بعد متاثرہ خاندان کو معاوضہ ادا کیا جائے گا۔
ریلوے ٹریک پر ویڈیو بناتے ہوئے لڑکا ٹرین سے ٹکرا گیا
واضح رہے کہ پپراہی تھانہ حلقہ کے بیلوا نرکٹیا گاؤں میں گیدڑوں نے بھی دہشت پھیلا رکھی ہے۔ گیدڑ 7 لوگوں کو کاٹ کر زخمی کر چکے ہیں، گیدڑوں کے جھنڈ نے جمعہ کی رات بھی 7 افراد کو اپنا نشانہ بنایا اور انہیں زخمی کر دیا۔
