پاکستان کے دو ٹرائیتھلیٹس نے چین اور ازبکستان میں ہونے والے الگ الگ بین الاقوامی مقابلوں میں شرکت کرتے ہوئے طویل فاصلے کے ٹرائیتھلون چیلنجز مکمل کرلیے۔
پاکستان نیوی کے لیفٹیننٹ شہزادہ اسد نے چین کے شہر ڈالی میں ہونے والا آئرن مین 70.3 ڈالی مقابلہ 6 گھنٹے 30 منٹ اور 41 سیکنڈ میں مکمل کیا۔
لاہور کے فالکن ٹرائیتھلون کلب سے وابستہ شہزادہ اسد نے 1.9 کلومیٹر تیراکی 40 منٹ 57 سیکنڈ، 90 کلومیٹر سائیکلنگ 2 گھنٹے 59 منٹ 8 سیکنڈ جبکہ 21.1 کلومیٹر دوڑ 2 گھنٹے 30 منٹ 16 سیکنڈ میں مکمل کی۔
ڈالی میں ہونے والے مقابلے میں ایتھلیٹس کو تیراکی، سائیکلنگ اور دوڑ کے مراحل میں مجموعی طور پر 113 کلومیٹر کا فاصلہ طے کرنا تھا۔
دوسری جانب پاکستانی ٹرائیتھلیٹ جبران جاوید نے ازبکستان میں ہونے والا چیلنج سمرقند مقابلہ 5 گھنٹے 25 منٹ اور 52 سیکنڈ میں مکمل کیا۔
کراچی کے ایس وی آر سی سے وابستہ جبران جاوید نے 1.9 کلومیٹر تیراکی 40 منٹ 29 سیکنڈ، 86 کلومیٹر سائیکلنگ 2 گھنٹے 34 منٹ 37 سیکنڈ جبکہ 21.5 کلومیٹر دوڑ 1 گھنٹہ 55 منٹ 15 سیکنڈ میں مکمل کی۔
جبران نے ٹرانزیشن سمیت مجموعی طور پر 109.4 کلومیٹر کا فاصلہ 5 گھنٹے 25 منٹ اور 52 سیکنڈ میں طے کیا۔
سمرقند میں سائیکلنگ کا مرحلہ تاریخی اور جدید مقامات سے گزرا جبکہ دوڑ کا چار چکروں پر مشتمل مرحلہ سلک روڈ سمرقند کمپلیکس کے خوبصورت روئنگ کینال کے اطراف منعقد ہوا۔
شہزادہ اسد اور جبران جاوید کی الگ الگ بین الاقوامی ٹرائیتھلون مقابلوں میں شرکت اور طویل فاصلے کے چیلنجز کی کامیاب تکمیل پاکستان میں ٹرائیتھلون کے کھیل میں بڑھتی ہوئی سرگرمی کی عکاسی کرتی ہے۔
DATE . 15/Sep/2026