راولپنڈی :وزیراعلیٰ پنجاب مریم نواز شریف کی خصوصی ہدایت پرستھرا پنجاب پروگرام کے تحت عیدالاضحیٰ صفائی آپریشن میں شریک صفائی ہیروز کو خراجِ تحسین پیش کرنے کے لیے راولپنڈی ویسٹ مینجمنٹ کمپنی نے ڈویژن بھر پروقار تقاریب کا انعقاد کیا۔
راولپنڈی تحصیل کی مرکزی تقریب رائل کیسل ہوٹل، سکستھ روڈ پر منعقد ہوئی، جس میں سپیشل سیکرٹری بلدیات پنجاب آسیہ گل مہمانِ خصوصی تھیں جبکہ صدارت ایم این اے میڈم طاہرہ اورنگزیب نے کی۔دیگر معزز مہمانوں میں ایم این اے راجہ قمرالاسلام، ڈپٹی کمشنر راولپنڈی حسن وقار چیمہ ودیگر سیاسی، سماجی و میڈیا شخصیات نے بھرپور شرکت کی۔
تقریب کے دوران مہمانانِ خصوصی نے صفائی کے عملے کے ساتھ اظہارِ یکجہتی کیا اور تحصیل راولپنڈی کے 1000 سے زائد صفائی ورکرزمیں فی کس 10,000 روپے کے چیک تقسیم کیے۔ یہ چیکس ان محنت کشوں کی شبانہ روز محنت اور عیدالاضحیٰ کے دوران قربانی کے ایام میں شہر کو صاف رکھنے کی لگن کا اعتراف تھے۔
صدرِ تقریب ایم این اے طاہرہ اورنگزیب نے کہا کہ صفائی کرنے والے مزدور ہمارے معاشرے کے وہ ستون ہیں جن کے بغیر کوئی نظام قائم نہیں رہ سکتا۔ حکومت ان کے مسائل حل کرنے اور انہیں مستقل روزگار کی فراہمی کے لیے ہر ممکن اقدام کرے گی۔تقریب سے دیگرمقررین نے بھی خطاب کیا۔
سپیشل سیکرٹری بلدیات پنجاب آسیہ گل نے اپنے خطاب میں کہا کہ صفائی ورکرز پنجاب کے اصل ہیرو ہیں۔ ان کی خدمات کو تسلیم کرنا حکومت پنجاب کی ترجیح ہے۔ وزیراعلیٰ مریم نواز کے وژن کے مطابق صفائی کے شعبے کو باعزت بنانے اور ورکرز کو ریلیف فراہم کرنے کے لیے اقدامات جاری رہیں گے۔
صفائی ورکرز نے بھی تقریب میں اظہارِ خیال کرتے ہوئے کہا کہ انہیں پہلی بار احساس ہوا ہے کہ ان کی خدمات کو عزت دی جا رہی ہے۔ انہوں نے وزیراعلیٰ پنجاب، آر ڈبلیو ایم سی اور ضلعی انتظامیہ کا شکریہ ادا کیا۔
DATE . June/22/2025
