اسلام آباد: پاکستان میں روس کے سفیر البرٹ پی خوریو نے رکن قومی اسمبلی اور پاکستان پیپلز پارٹی کی سینئر رہنما سحر کامران کو پاکستان-روس تعلقات کے فروغ میں ان کی نمایاں خدمات کے اعتراف میں تعریفی یادگاری شیلڈ پیش کی۔ اس سلسلے میں روسی سفارتخانے میں ایک خصوصی تقریب کا انعقاد کیا گیا۔
تقریب میں روسی حکام اور دیگر معزز مہمانوں نے شرکت کی۔ اس موقع پر خطاب کرتے ہوئے روسی سفیر نے سحر کامران کے ساتھ دیرینہ تعلقات اور ان کی کوششوں کو سراہا، جن کی بدولت دوطرفہ روابط مزید مستحکم ہوئے۔
سحر کامران نے سوچی فورم، نووسیبرسک میں ایس سی او اور برکس ویمن کانگریس، سینٹ پیٹرزبرگ میں یوریشین ویمن فورم، ماسکو نیوکلیئر کانفرنس، اور کازان فورم جیسے بین الاقوامی پلیٹ فارمز پر پاکستان کی بھرپور نمائندگی کی۔
اس سے قبل 2018 میں بھی انہیں روسی وزارت خارجہ کی جانب سے “ایوارڈ آف کوآپریشن” سے نوازا گیا تھا۔
سحر کامران 2012 سے 2018 تک سینیٹر کے عہدے پر فائز رہ چکی ہیں۔ وہ نہ صرف پاکستان اور روس بلکہ پاکستان اور سعودی عرب کے تعلقات کے فروغ، تعلیم، سماجی خدمات اور فلاحی سرگرمیوں کے حوالے سے بھی معروف شخصیت ہیں۔
ان کی خدمات کے اعتراف میں انہیں پاکستان کے اعلیٰ قومی اعزاز “تمغہ امتیاز” سے بھی نوازا جا چکا ہے۔ سحر کامران سینٹر فار پاکستان اینڈ گلف سٹڈیز کی سرپرست اعلیٰ بھی ہیں۔
انہوں نے “شاہ عبداللہ بن عبدالعزیز السعود کی بصیرت” سمیت کئی اہم کتب تصنیف کی ہیں، جبکہ پاکستان کے خلیجی، سعودی اور روسی تعلقات پر ان کے تحقیقی مقالے بھی شائع ہو چکے ہیں۔ ان کے مضامین اور تجزیے قومی و بین الاقوامی جرائد و اخبارات میں تواتر سے شائع ہوتے ہیں۔
DATE . Apr/12/2025
