سعودی عرب کا حج سیزن میں وزٹ ویزا ہولڈرز کو رہائش فراہم کرنے پر بھاری جرمانے کا انتباہ

ریاض: سعودی عرب کی وزارت داخلہ نے حج سیزن کے دوران وزٹ ویزا ہولڈرز کو رہائش فراہم کرنے کے حوالے سے سخت انتباہ جاری کیا ہے۔
وزارت نے واضح کیا ہے کہ یکم ذی القعدہ سے 14 ذی الحجہ تک مکہ مکرمہ اور مقدس مقامات میں ہوٹلوں، اپارٹمنٹس، نجی مکانات یا عازمین کے رہائشی مراکز سمیت کسی بھی جگہ وزٹ ویزا ہولڈرز کو رہائش فراہم کرنے، پناہ دینے یا غیر قانونی قیام میں مدد کرنے پر ایک لاکھ ریال تک جرمانہ عائد کیا جائے گا۔
سعودی پریس ایجنسی (ایس پی اے) کے مطابق، وزارت داخلہ نے اپنے بیان میں خبردار کیا ہے کہ خلاف ورزی کرنے والے افراد کی تعداد اور مدد فراہم کرنے کی نوعیت کی بنیاد پر جرمانے کی رقم میں اضافہ کیا جائے گا۔
وزارت نے تمام افراد پر زور دیا ہے کہ وہ عازمین حج کی حفاظت اور اطمینان کے ساتھ مناسک کی ادائیگی کو یقینی بنانے کے لیے حج کے قواعد و ضوابط پر سختی سے عمل کریں۔

DATE . May/5/2025