مکہ مکرمہ:سعودی عرب کی وزارت حج و عمرہ نے تمام عازمین حج کو سختی سے ہدایت کی ہے کہ وہ اپنا مخصوص شناختی کارڈ، جسے ’نسک کارڈ‘ کہا جاتا ہے، ہر وقت اپنے ساتھ رکھیں۔ یہ ہدایت عازمین کی سہولت اور حج کے انتظامات کو بہتر بنانے کے لیے جاری کی گئی ہے۔
وزارت حج کی جانب سے جاری کردہ ایک باضابطہ بیان میں واضح کیا گیا ہے کہ ’نسک کارڈ‘ عازمین کے سرکاری حج اجازت نامے کی حیثیت رکھتا ہے۔ اس کارڈ کا بنیادی مقصد حج کے دوران مکہ مکرمہ اور مشاعر مقدسہ (منیٰ، عرفات اور مزدلفہ) میں عازمین کی نقل و حرکت کو منظم بنانا ہے، تاکہ انہیں کسی قسم کی پریشانی کا سامنا نہ کرنا پڑے اور انہیں ہر ممکن سہولت باآسانی فراہم کی جا سکے۔
بیان میں مزید بتایا گیا ہے کہ ’نسک کارڈ‘ میں عازمین حج کے بارے میں تمام ضروری اور اہم تفصیلات درج کی گئی ہیں۔ ان تفصیلات میں مکہ مکرمہ اور مدینہ منورہ میں ان کی رہائشی عمارتوں کے مکمل پتے، حج خدمات فراہم کرنے والے متعلقہ ادارے کی بنیادی معلومات، اور مشاعر مقدسہ (منیٰ، عرفات اور مزدلفہ) میں ان کے عارضی قیام گاہوں کے واضح مقامات شامل ہیں۔
وزارت حج نے اس بات پر خاص طور پر زور دیا ہے کہ اس ’نسک کارڈ‘ کے ذریعے نہ صرف عازمین حج کی شناخت آسانی کے ساتھ ممکن ہو سکے گی، بلکہ ان عازمین کی مدد کرنا بھی بہت آسان ہو جائے گا جو کسی وجہ سے اپنے رہائشی مقامات سے بھٹک جاتے ہیں۔ کارڈ پر موجود مفصل معلومات کی بدولت انہیں بحفاظت ان کی اصل منزل تک پہنچانا ممکن ہو سکے گا۔ اس لیے تمام عازمین کو سختی سے ہدایت کی جاتی ہے کہ وہ اس کارڈ کو ہر وقت اپنے پاس محفوظ رکھیں
DATE . May/3/2025
