اسلام آباد: ایوانِ صدر میں صدرِ مملکت آصف علی زرداری اور اردن کے فرماں روا شاہ عبداللہ دوم کے درمیان اہم ملاقات ہوئی۔ ملاقات میں خاتونِ اوّل بی بی آصفہ بھٹو زرداری، چیئرمین پیپلز پارٹی بلاول بھٹو زرداری اور سینیٹر شیری رحمان بھی شریک تھے۔
صدر آصف علی زرداری نے پاکستان اور اردن کے دیرینہ اور برادرانہ تعلقات کو مزید مضبوط بنانے کے عزم کا اعادہ کیا۔ دونوں رہنماؤں نے دوطرفہ تعاون کو نئے شعبوں تک وسعت دینے پر اتفاق کیا، جبکہ صدر نے اردن کے ساتھ قریبی اور مضبوط شراکت داری جاری رکھنے کے عزم کو دہرایا۔
ملاقات میں مشرقِ وسطیٰ کی صورتحال پر بھی تبادلہ خیال ہوا، اور دونوں رہنماؤں نے خطے میں امن و استحکام کی ضرورت پر زور دیا۔ صدر زرداری اور شاہ عبداللہ دوم نے دو ریاستی حل کے تحت ایک آزاد، خودمختار اور قابلِ عمل فلسطینی ریاست کے قیام کی حمایت پر اتفاق کیا۔
اجلاس میں ڈپٹی وزیر اعظم و وزیرِ خارجہ سینیٹر اسحاق ڈار، وفاقی وزیر برائے ماحولیاتی تبدیلی سینیٹر مصدق ملک، سیکرٹری خارجہ سمیت پاکستان اور اردن کے سفیران بھی موجود تھے۔
تقریب کے دوران صدر آصف علی زرداری نے شاہ عبداللہ دوم کو پاکستان کا سب سے بڑا سول اعزاز ’’نشانِ پاکستان‘‘ عطا کیا، جبکہ شاہِ اردن نے صدر زرداری کو ’’وسامُ النّہضہ المرصّع‘‘ (آرڈر آف دی رینیسانس) سے نوازا، جو سربراہانِ مملکت اور معزز عالمی شخصیات کو دیا جاتا ہے۔
اس پر وقار تقریب میں اعلیٰ سول و عسکری قیادت، جن میں وزیراعظم محمد شہباز شریف، فیلڈ مارشل سید عاصم منیر، ائیر چیف مارشل ظہیر احمد بابر سدھو اور ایڈمرل نوید اشرف شامل تھے، نے شرکت کی۔ وفاقی کابینہ کے اراکین اور متعدد ممالک کے سفرا بھی اس موقع پر موجود تھے۔
DATE . Nov/17/2025
