دبئی: صدر آصف علی زرداری نے متحدہ عرب امارات کے نائب صدر، وزیرِاعظم اور دبئی کے حکمران شیخ محمد بن راشد المکتوم سے ملاقات کی، جس میں پاکستان اور متحدہ عرب امارات کے درمیان دوطرفہ تعلقات کو مزید مضبوط بنانے کے طریقوں پر تفصیلی تبادلۂ خیال کیا گیا۔ ملاقات میں اقتصادی، تجارتی اور سرمایہ کاری کے شعبوں میں تعاون کے فروغ پر خصوصی توجہ دی گئی۔
صدر آصف علی زرداری نے شیخ محمد بن راشد المکتوم کو دبئی کے حکمران کی حیثیت سے دو دہائیوں پر محیط قیادت پر مبارکباد دی اور دبئی کی سیاحت، مالیات اور ابھرتی ہوئی ٹیکنالوجیز کے عالمی مرکز کے طور پر غیر معمولی ترقی کو سراہا۔ دونوں فریقین نے دبئی کے ترقیاتی تجربات سے استفادہ کرنے پر بھی خیالات کا تبادلہ کیا، بالخصوص بندرگاہوں، لاجسٹکس، انفارمیشن ٹیکنالوجی اور ڈیجیٹل مالیاتی خدمات کے شعبوں میں تعاون کے مواقع کا جائزہ لیا گیا۔
صدر آصف علی زرداری نے پاکستان میں جاری اقتصادی اصلاحات، خاص طور پر سرمایہ کاری میں سہولت کاری اور نجکاری کے اقدامات پر روشنی ڈالی اور شیخ محمد بن راشد المکتوم کو پاکستان کے دورے کی دعوت بھی دی۔
ملاقات میں دونوں فریقین نے پاکستان اور متحدہ عرب امارات کے درمیان برادرانہ تعلقات کو مزید مستحکم بنانے کے عزم کا اعادہ کیا، دوطرفہ تعلقات کی مثبت سمت پر اطمینان کا اظہار کیا اور اعلیٰ سطح تبادلوں کی اہمیت پر زور دیا۔ صدر نے شیخ محمد بن زاید النہیان کے حالیہ دورے اور پاکستان کی اقتصادی ترقی کے لیے متحدہ عرب امارات کی مسلسل حمایت کو سراہا، جبکہ متحدہ عرب امارات میں مقیم پاکستانی برادری کے عوامی سطح پر تعلقات کو مضبوط بنانے میں کردار کو بھی اجاگر کیا۔
ملاقات میں خاتونِ اوّل بی بی آصفہ بھٹو زرداری، چیئرمین پاکستان پیپلز پارٹی بلاول بھٹو زرداری، وفاقی وزیر داخلہ و انسدادِ منشیات سید محسن نقوی اور متحدہ عرب امارات میں پاکستان کے سفیر بھی موجود تھے۔
DATE . Jan/29/2026
