اسلام آباد: صدر مملکت آصف علی زرداری سے وزیراعظم نے ایوانِ صدر میں ملاقات کی، جس میں نائب وزیراعظم و وزیر خارجہ سینیٹر اسحاق ڈار اور وزیر قانون و انصاف سینیٹر اعظم نذیر تارڑ بھی شریک تھے۔ملاقات میں پہلگام حملے کے بعد بھارت کے ساتھ بڑھتی ہوئی کشیدگی اور موجودہ سیکیورٹی صورتحال پر تفصیلی تبادلہ خیال کیا گیا۔ دونوں رہنماؤں نے بھارت کے جارحانہ رویے اور اشتعال انگیز بیانات پر گہری تشویش کا اظہار کیا۔جاری کردہ اعلامیے کے مطابق بھارتی رویہ خطے کے امن و استحکام کے لیے خطرہ ہے۔ پاکستان اپنی علاقائی سالمیت اور خودمختاری پر کبھی سمجھوتہ نہیں کرے گا اور کسی بھی قسم کی جارحیت کا منہ توڑ جواب دیا جائے گا۔ اعلامیے میں کہا گیا کہ پاکستانی قوم متحد ہے اور اپنی مسلح افواج کے شانہ بشانہ کھڑی ہے، جو ہر قسم کے خطرے سے نمٹنے کی مکمل صلاحیت رکھتی ہیں۔ملاقات میں بھارتی جارحیت کے ممکنہ نتائج اور پاکستان کے ردعمل کا بھی جائزہ لیا گیا۔ اجلاس کے دوران بھارتی قیادت کی جانب سے پہلگام حملے کے بعد بغیر کسی تحقیق کے لگائے گئے الزامات پر افسوس کا اظہار کیا گیا۔اعلامیے میں کہا گیا کہ پاکستان گزشتہ دو دہائیوں سے دہشت گردی کا شکار رہا ہے اور اس دوران انسانی جانوں اور معیشت کو بھاری نقصان پہنچا۔ عالمی برادری سے مطالبہ کیا گیا کہ وہ بھارت کی جانب سے پاکستان میں عسکریت پسندوں کو فنڈنگ، تربیت اور بھیجنے جیسے اقدامات کا نوٹس لے۔صدر مملکت نے بھارتی بے بنیاد الزامات پر حکومت کے ردعمل اور ذمہ دارانہ حکمت عملی کی تعریف کی اور کہا کہ پاکستان اپنی خودمختاری، علاقائی سالمیت اور اہم قومی مفادات کے تحفظ کے لیے ہر ممکن اقدام کرے گا۔اجلاس میں کشمیری عوام کے حقِ خودارادیت سے متعلق اقوام متحدہ کی سلامتی کونسل کی قراردادوں پر فوری عمل درآمد کی ضرورت پر بھی زور دیا گیا۔آخر میں وزیراعظم نے کوویڈ-19 سے صحتیاب ہونے پر صدر مملکت کی خیریت بھی دریافت کی۔
Date . May/2/2025
