طالبان کے زیرِ اقتدار افغانستان میں انسانی بالخصوص خواتین کے حقوق کی خلاف ورزیاں عروج پر ہیں،افغانستان میں لڑکیوں پر گزشتہ 3 سالوں سے ثانوی اور اعلیٰ تعلیم کے دروازے بند ہیں۔
تعلیم کی حالت زار پر یو این ویمن ایگزیکٹو ڈائریکٹر سیما بہاؤس کے انکشافات سامنے آگئے۔
سیما بہاؤس کے مطابق نئے تعلیمی سال کے آغاز کے ساتھ مزید 4 لاکھ لڑکیاں تعلیم سے محروم ہو گئی ہیں، تعلیم سے محروم لڑکیوں کی مجموعی تعداد 22 لاکھ تک پہنچ گئی ہے،اگر موجودہ پابندیاں برقرار رہیں تو 2030 تک افغانستان کی 40 لاکھ سے زیادہ لڑکیاں تعلیم سے محروم رہ جائیں گی۔
انہوں نے متنبہ کیا ہے کہ افغانستان میں لڑکیوں کو تعلیم سے محروم رکھنا نسلوں تک اثرات مرتب کرے گا،وقت آ چکا ہے کہ افغان حکومت اس سنگین مسئلے کا فوری حل نکالے۔
یو این ویمن ایگزیکٹو ڈائریکٹر نے طالبان حکومت سے لڑکیوں کو فوری طور پر سکول واپس جانے کی اجازت دینے اورخواتین کے بنیادی حقوق کو بحال کرنے کا مطالبہ کیا ہے۔
