لاہور: وزیراعلیٰ پنجاب مریم نواز شریف نے پناہ گزین افراد کے عالمی دن کے موقع پر اپنے پیغام میں کہا کہ مہاجر ہونا کوئی جرم نہیں بلکہ ایک کربناک مجبوری ہے۔ کوئی شوق سے پناہ گزین نہیں بنتا، زندگی بچانے کے لیے اپنا آنگن، اپنی مٹی، اپنی چھت چھوڑنا پڑتی ہے۔ جنگیں ختم ہو جاتی ہیں مگر مہاجرین کی بے گھری نسلوں تک قائم رہتی ہے۔
انہوں نے کہا کہ فلسطین اور شام کے دربدر مہاجرین انسانیت کے لیے ایک کڑا امتحان ہیں۔ دنیا کو سمجھنا چاہیے کہ پناہ مانگنے والا کمزور نہیں، بلکہ مظلوم ہوتا ہے۔
وزیراعلیٰ نے مزید کہا کہ پاکستان نے محدود وسائل کے باوجود فراخ دلی سے لاکھوں مہاجرین کی عزت کے ساتھ میزبانی کی ہے اور ہمیشہ مظلوموں کی آواز بنا ہے۔ ہم مہاجرین کی فلاح و بہبود کے لیے اپنی آواز بلند کرتے رہیں گے۔
مریم نواز شریف نے دعا کی کہ دنیا میں امن قائم ہو، ظلم کا خاتمہ ہو، اور ہر انسان کو سکون نصیب ہو۔
DATE . June/20/2025
