باکو:وفاقی وزیر اطلاعات عطاء اللہ تارڑ اورڈی ایٹ کے سیکرٹری جنرل برائے اقتصادی تعاون ایمبیسیڈر اسیاکا عبدالقادر امام کے درمیان باکو میں ملاقات ہوئی۔دونوں رہنماؤں نے ڈی ایٹ ممالک کے درمیان باہمی تعاون بالخصوص میڈیا کے شعبہ میں تعلقات اور فیک نیوز سمیت اہم عالمی امور پر تبادلہ خیال کیا۔
اس موقع پر گفتگو کرتے ہوئے وفاقی وزیراطلاعات نے کہاکہ فیک نیوز بڑا چیلنج ہے۔سوشل میڈیا پلیٹ فارمز پر مؤثر حکمت عملی کے تحت فیکٹ چیکنگ کا نظام وضع کرنا ضروری ہے۔فیک نیوز پر مکمل کنٹرول کے بغیر ڈی ایٹ ممالک کا مشترکہ بیانیہ مضبوط نہیں ہوسکتا۔ انہوں نےکہاکہ ڈی ایٹ کے رکن ممالک کو اپنی متفقہ میڈیا پالیسی کے ذریعے غلط معلومات کا مقابلہ کرنا ہوگا۔
انہوں نے کہا کہ ثقافتی تعاون سے خطے میں ہم آہنگی اور مثبت امیج کا فروغ ممکن ہے۔ثقافت، ابلاغ اور ٹیکنالوجی کے اشتراک سے ڈی ایٹ ممالک کے عوام کو مزید قریب لایا جاسکتا ہے۔ وفاقی وزیر اطلاعات عطاء اللہ تارڑ نےعالمی سطح پر اقتصادی ترقی اور خطے کے امن کے لیے ڈی ایٹ کے سیکرٹری جنرل کے موثر کردار کو سراہا اورکہاکہ سیکرٹری جنرل کی رہنمائی اور تجربے سے ڈی ایٹ کے مقاصد کی تکمیل میں بھرپور کردار ادا کریں گے۔
سیکرٹری جنرل ایمبیسیڈر اسیاکا عبدالقادر امام نےکہاکہ ڈی ایٹ کے رکن ممالک کی کامیابی کا دارومدار اس بات پر ہے کہ وہ ایک دوسرے کی ترقی میں کس حد تک معاون ثابت ہوتے ہیں۔ انہوں نےکہاکہ میڈیا کے شعبے میں ایک دوسرے کے تجربات سے سیکھنے اور مشترکہ ٹریننگز اور ورکشاپس کا انعقاد ناگزیر ہے۔عالمی سطح پر ایک مضبوط، مثبت بیانیہ کی تشکیل کیلئے ڈی ایٹ کے پلیٹ فارم پر تعاون کو مزید مستحکم کرنا ہوگا۔
DATE . Nov/24/2025
