پاکستانی لوک گلوکارہ صنم ماروی نے ایک کانسرٹ کا معاوضہ 25 لاکھ روپے لینے کا انکشاف کیا ہے۔
صوفیانہ کلام اور لوک گلوکاری کی وجہ سے مشہور صنم ماروی حال ہی میں ایک نجی ٹی وی کے پروگرام میں شریک ہوئیں جس دوران انھوں نے اپنے کیرئیر کے اتار چڑھاؤ سمیت زندگی کے مختلف موضوعات پر گفتگو کی۔
صنم ماروی کے مطابق مجبوری میں اس فیلڈ کا انتخاب کیا، بہن بھائیوں کی کفالت کی وجہ سے کم عمری سے ہی کام کرنا شروع کر دیا تھا، جب میں 4 سال کی تھی اس وقت میرا خاندان حیدرآباد منتقل ہوگیا تھا۔
گلوکارہ نے کہا کہ میرا پہلا معاوضہ 27 ہزار روپے تھا، یہ اس وقت کے لحاظ سے ایک بہت بڑی رقم تھی، میرے گھر میں اس وقت کوئی سامان تک نہیں تھا، پہلا معاوضہ آتے ہی میں نے اپنی والدہ کیلئے گھر کاسامان مثلاً فریج ، ٹی وی اور بیڈ خریدا تھا۔
صنم ماروی نے مزید بتایا کہ میں اب کانسرٹ سمیت شادی کے فنکشن کے پروگرام کرتی ہوں، میرے معاوضے میں ایک نئی آلٹو کار خریدی جا سکتی ہے، یوں کہیں کہ میں ایک کانسرٹ کا معاوضہ 25 لاکھ روپے تک وصول کرتی ہوں۔
DATE . Nov/18/2025
