نئی دہلی میں پاکستانی ہائی کمیشن کی جانب سے یومِ پاکستان کی تقریب کا انعقاد

بھارتی دارالحکومت نئی دہلی میں پاکستانی ہائی کمیشن کی جانب سے یومِ پاکستان کی تقریب کا انعقاد کیا گیا، تقریب کی میزبانی نئی دہلی میں موجود پاکستانی ہائی کمیشن نے کی۔
تقریب میں سیاسی شخصیات، سفارتکاروں، تاجروں، میڈیا کے نمائندوں اور سول سوسائٹی کے ارکان سمیت مہمانوں کی شرکت،چانسری کے لان میں چارج ڈی افیئرز نے معزز مہمانوں کا استقبال کیا،اس موقع پر یوم پاکستان کی اہمیت کو اجاگر کیا گیا۔
اس موقع پر خطاب کرتے ہوئے ناظم الامور نے کہا کہ 23 مارچ 1940ء کی لاہور کی اہم قرارداد برصغیر کے مسلمانوں کے لیے امید کی کرن تھی، پاکستان کا قیام قائداعظم محمد علی جناح کی متحرک اور ولولہ انگیز قیادت میں پرامن اور جمہوری جدوجہد کی تکمیل ہے، ہمارے متحرک نوجوان، سول سوسائٹی اور آزاد میڈیا نے آگے بڑھنے کے لیے قوم کے عزائم کو تقویت دی ہے،۔
سعید احمد وڑائچ نے کہا کہ پاکستان کی خارجہ پالیسی عالمی امن و سلامتی اور اجتماعی فلاح و بہبود اور بین الاقوامی تعاون کو مستقل فروغ دینے پر قائم ہے، پاکستان نے ہمیشہ برابری، باہمی احترام اور پرامن بقائے باہمی کے اصولوں پر مبنی دیگر ریاستوں کے ساتھ دوستانہ تعلقات کی کوشش کی ہے۔
یومِ پاکستان کی تقریب میں پاکستان کے دلکش رنگوں کو پیش کیا گیا، پاکستان کی شاندار ثقافت اور ورثے کی عکاسی کرنے والے نامور فنکاروں کے دلکش مناظر اور شاندار فن پارے بھی پیش کئے گئے

DATE . Mar/21/2025