اسلام آباد:نائب وزیراعظم ووزیر خارجہ اسحاق ڈار کو برطانیہ کے وزیرخارجہ ڈیوڈ لیمی نے ٹیلی فون کیا ۔
ترجمان دفتر خارجہ کے مطابق نائب وزیراعظم نے انہیں پاکستان کے متعدد شہروں پر بھارت کے غیر قانونی اور بلا اشتعال حملوں کی وجہ سے علاقائی صورتحال سے آگاہ کیا۔نائب وزیراعظم اسحاق ڈار نے کہاکہ بھارتی بلااشتعال حملوں میں بے گناہ شہری، بشمول خواتین، بچے اور بزرگ شہید ہوئے۔پاکستان نے بین الاقوامی قوانین اور اقوام متحدہ کے چارٹر کی ان خلاف ورزیوں کے پیش نظر تحمل کا مظاہرہ کیا ہے۔ نائب وزیراعظم کے کہاکہ بھارتی جارحیت کی وجہ سے علاقائی امن و سلامتی کو خطرہ ہے۔ حکومت پاکستان ملک کی خود مختاری اور علاقائی سالمیت کے دفاع کے لیے پرعزم ہے۔
برطانوی وزیرخارجہ ڈیوڈ لیمی نے ابھرتی ہوئی صورتحال پر گہری تشویش کا اظہار کر تے ہوئے شہریوں کی جانوں کے المناک نقصان پر تعزیت کی ۔ انہوں نے دونوں فریقوں کو تحمل سے کام لینے اور کشیدگی کو کم کرنے کی ضرورت پر زور دیا-
DATE . May/9/2025
