اسلام آباد:نائب وزیراعظم محمد اسحاق ڈار نے چین کے وزیر خارجہ وانگ ژی کے ساتھ ٹیلی فون پر بات چیت کی ہے۔
ترجمان دفتر خارجہ کے مطابق محمد اسحاق ڈار نے وانگ ژی کو علاقائی صورتحال پر بریفنگ دیتے ہوئے بھارت کے یکطرفہ اور غیر قانونی اقدامات کے ساتھ ساتھ پاکستان کے خلاف اس کے بے بنیاد پروپیگنڈے کو سختی سے مسترد کیا۔
اسحاق ڈار نے چین کی مسلسل اور غیر متزلزل حمایت پر تعریف کا اظہار کرتے ہوئے پاک چین دوستی اور سٹریٹجک شراکت داری کے مشترکہ وژن کے لیے پاکستان کے مضبوط عزم کا اعادہ کیا۔ انہوں نے تمام شعبوں میں دوطرفہ تعاون کو مزید مضبوط کرنے کے لیے پاکستان کے عزم پر زور دیا۔
دونوں رہنماؤں نے علاقائی امن و استحکام کو برقرار رکھنے، باہمی احترام کے فروغ اور یکطرفہ اور تسلط پسندانہ پالیسیوں کی مشترکہ مخالفت کرنے کے پختہ عزم کا اعادہ کیا۔ انہوں نے خطے کےامن، سلامتی اور پائیدار ترقی کے مشترکہ مقاصد کو آگے بڑھانے کے لیے ہر سطح پر قریبی روابط برقرار رکھنے پر اتفاق کیا-
DATE . Apr/27/2025
