بالی وڈ کی مشہور رقاصہ و اداکارہ نورا فتیحی کی گاڑی کو حادثہ پیش آیا جس کے بعد انہیں اسپتال منتقل کیا گیا۔
بھارتی میڈیا کے مطابق نورا فتیحی ہفتے کو ممبئی میں امریکی ڈی جے ڈیوڈ گیٹا کے کنسرٹ میں شرکت کے لیے جاتے ہوئے ایک سڑک حادثے کا شکار ہو گئیں، جس کے نتیجے میں ان کی گاڑی کو نقصان پہنچا۔
بھارتی میڈیا کا کہنا ہے کہ نورا فتیحی سن برن فیسٹیول میں ڈیوڈ گیٹا کے ساتھ اپنی طے شدہ پرفارمنس کے لیے جا رہی تھیں کہ ایک نشے میں دُھت ڈرائیور نے ان کی گاڑی کو ٹکر مار دی۔
حادثے کے بعد نورا کی ٹیم نے فوری طور پر انہیں قریبی اسپتال منتقل کیا، جہاں ڈاکٹروں نے سی ٹی اسکین کر کے اندرونی چوٹ یا خون بہنے کے امکان کو رد کیا۔
البتہ ڈاکٹروں نے تصدیق کی کہ ٹکر کے نتیجے میں نورا کو معمولی طور پر دماغی جھٹکا لگا ہے۔
بھارتی میڈیا کے مطابق ڈاکٹروں نے اداکارہ کو آرام کا مشورہ دیا لیکن نورا نے کنسرٹ میں جانے اور اپنی پرفارمنس مکمل کرنے پر اصرار کیا۔
حادثے کے بعد نورا کی گاڑی کی ایک تصویر بھی سوشل میڈیا پر وائرل ہوئی جس میں ٹکر لگنے کی وجہ سے کار پر نشانات دیکھے جاسکتے ہیں۔
DATE . Dec/22/2025
