اسلام آباد- وزیراعظم نےمارچ 2025 میں ترسیلات زر کا حجم 4.1 ارب ڈالر کی تاریخی سطح پر پہنچنے پر سمندر پار پاکستانیوں سے اظہارِ تشکر کیا ہے۔
انہوں نے بیرون ملک مقیم پاکستانیوں کی جانب سے ترسیلات زر کا تاریخ میں پہلی مرتبہ کسی بھی ایک ماہ میں 4 ارب ڈالر کی حد عبور کرنے کو خوش آئند قرار دیا ہے۔
وزیراعظم نے کہا ہے کہ مارچ 2025 میں ترسیلات زر ایک ماہ میں ریکارڈ کی گئی تاریخ کی بلند ترین سطح 4.1 ارب ڈالر تک پہنچ گئیں جبکہ رواں مالی سال اب تک ترسیلات زر مجموعی طور پر 28 ارب ڈالر تک پہنچ چکی ہیں۔
انہوں نے کہا ہے کہ گزشتہ سال مارچ کے مقابلے میں اس سال مارچ میں ترسیلات زر میں 37.4 فیصد اضافہ ہوا ہے،اسلام آباد میں منعقدہ اوورسیز پاکستانیز کنونشن کے تناظر میں ترسیلاتِ زر میں ریکارڈ اضافے کی خوش خبری کا آنا بیرون ملک مقیم پاکستانیوں کی لگن، جذبے اور ملکی معیشت میں اعتماد کا مظہر ہے۔
وزیراعظم نے کہا کہ ترسیلات زر کا ریکارڈ سطح پر پہنچنا سمندر پار پاکستانیوں کے حکومتی پالیسیوں پر اعتماد کی عکاسی ہے،سمندر پار پاکستانی بیرون ملک دن رات محنت اور لگن سے کام کرکے نہ صرف ملک و قوم کا نام روشن کررہے ہیں بلکہ ترسیلات زر سے ملکی معیشت کوبھی فائدہ پہنچا رہےہیں۔
انہوں نے سمندر پار مقیم پاکستانیوں کو ملک کا قیمتی اثاثہ قرار دیتے ہوئے کہا کہ مجھ سمیت پوری قوم کو اپنے محنت کش سمندر پار پاکستانیوں پر فخر ہے۔
وزیراعظم نے بیرون ملک مقیم پاکستانیوں کو تمام تر سہولیات فراہم کرنے کا بھی عزم ظاہر کیا ہے۔
DATE . Apr/14/2025
