لاہور:وزیراعلی ٰمریم نوازشریف کی ہدایت پر پنجاب بھرمیں مون سون ہنگامی پلان 2025پر عملدرآمد شروع کردیا گیا ہے۔ وزیراعلیٰ نے پلان پر عملدرآمد کی لمحہ بہ لمحہ رپورٹ طلب کرلی۔
وزیراعلی مریم نوازشریف کی ہدایت پر ہر ضلع میں ڈسٹرکٹ ایمرجنسی آپریشن سنٹر قائم کردیا گیا ہے جو 24گھنٹے فعال رہے گا ۔وزیراعلی ٰمریم نوازشریف کی ہدایت پر صوبہ بھرمیں برساتی نالوں کی بھرپور صفائی، بارشی پانی کے بہاؤ کے راستے کلیئر کیے جارہے ہیں۔وزیراعلیٰ کی ہدایت پر پی ڈی ایم اے کی خصوصی ہیلپ لائن 1129 مکمل طورپر فعال ہے ،جس پرصوبہ بھر میں کئی سے بھی رابطہ ممکن ہے۔
پی ڈی ایم اے نے حادثات اور نقصانات سے بچاؤ کے لئے ایس او پیز جاری کر دئیے ہیں۔طغیانی کے پیش نظر نوجوانوں خاص طورپر بچوں کے نہروں میں نہانے پر پابندی پر عملدرآمد یقینی بنانے کی ہدایت کی گئی ہے۔والدین سے بچوں کو برساتی نالوں میں نہانے اورقریب جانے سے روکنے کی اپیل کی گئی ہے۔
وزیراعلیٰ مریم نوازشریف نے انتظامیہ اور دیگر اداروں کو متعلقہ علاقوں میں بوسیدہ عمارتوں کی نشاندہی کی ہدایت کی ہے اور بوسیدہ گھروں کے مکینوں سے احتیاطاً محفوظ مقامات پر منتقلی کی اپیل اورشہریوں سے برقی آلات، زمین پر گرے تار اور کھمبوں کو چھونے سے گریز،آسمانی بجلی کی گرج چمک کے دوران کھلے آسمان تلے جانے سے گریز ،چھتوں کی صفائی بالخصوص بارش کے بعد بروقت نکاسی آب کو یقینی بنانے اوراربن فلڈنگ سے قبل محفوظ مقامات پر منتقل ہونے کی ہدایت کی گئی ہے۔
وزیراعلی مریم نوازشریف نے تمام ڈپٹی کمشنرز، اسسٹنٹ کمشنرز، ریسکیو 1122اور دیگر اداروں کو ہمہ وقت تیار اور مستعد د رہنے کی ہدایت بھی کی ہے۔وزیراعلیٰ مریم نوازشریف نے برسات کے دوران عوام کو احتیاطی تدابیر پر عملدرآمد یقینی بنانے کی اپیل کی ہے اورکہا ہے کہ عوام کی حفاظت حکومت کی ذمہ داری ہے،اپنا فرض ضرور نبھائیں گے ۔
انہوں نے کہا کہ مون سون کے دوران عوام حادثات سے بچنے کے لئے احتیاطی تدابیر پر عملدرآمد ضرور کریں۔وزیراعلیٰ نے کہا کہ ہر فرد کی جان قیمتی ہے، تمام تر وسائل بروئے کار لائیں گے-
DATE . June/29/2025
