لاہور: وزیراعلیٰ پنجاب مریم نواز شریف سے ورلڈ بینک کے سبکدوش ہونے والے کنٹری ڈائریکٹر ناجے بن حسین نے لاہور میں الوداعی ملاقات کی۔ وزیراعلیٰ نے ناجے بن حسین کی پاکستان میں ان کی 2020 سے اب تک کی نمایاں خدمات کو سراہا۔
ملاقات کے دوران ورلڈ بینک اور حکومت پنجاب کے درمیان شراکت داری کو مزید مضبوط بنانے پر اتفاق کیا گیا۔ وزیراعلیٰ مریم نواز شریف نے کہا کہ “حکومت پنجاب ورلڈ بینک کے ساتھ اپنی مضبوط، مؤثر اور دیرینہ شراکت داری کو بے حد قدر کی نگاہ سے دیکھتی ہے۔”
انہوں نے کہا کہ تعلیم، صحت اور دیگر سماجی و ترقیاتی شعبوں میں ورلڈ بینک کی معاونت قابلِ تحسین ہے۔ وزیراعلیٰ نے اس بات پر زور دیا کہ پاکستان اور ورلڈ بینک کا 40 ارب ڈالر کا نیا کنٹری پارٹنرشپ فریم ورک (CPF) “اُڑان پاکستان” کے وژن کی عکاسی کرتا ہے۔
مریم نواز شریف نے بتایا کہ اس وقت پنجاب میں ورلڈ بینک کے تعاون سے 2.4 ارب ڈالر مالیت کے 12 منصوبے جاری ہیں جن میں پنجاب رورل سسٹین ایبل واٹر سپلائی اینڈ سینیٹیشن پروگرام، ریزیلینٹ اِنکلیوسو ایگریکلچر ٹرانسفارمیشن، اور ہیومن کیپیٹل انویسٹمنٹ پراجیکٹس شامل ہیں۔ انہوں نے کہا کہ یہ منصوبے صوبے میں سروس ڈیلیوری کو بہتر بنانے میں اہم کردار ادا کر رہے ہیں۔
وزیراعلیٰ نے دیہات میں صاف پانی اور سینیٹیشن کی فراہمی کے لیے حکومت کی انتھک کوششوں کا ذکر کرتے ہوئے کہا کہ پنجاب رورل سسٹین ایبل واٹر سپلائی اینڈ سینیٹیشن پروگرام پورے صوبے میں کامیابی سے جاری ہے۔
انہوں نے کہا کہ ورلڈ بینک سے اشتراک کو مزید مستحکم اور پائیدار بنانے کے لیے اقدامات جاری ہیں اور حکومت پنجاب اس شراکت کو عوامی فلاح و بہبود کے لیے بھرپور طریقے سے استعمال کر رہی ہے۔
DATE . May/30/2025
