لاہور: وزیراعلیٰ پنجاب مریم نواز شریف کی زیر صدارت ایک خصوصی اجلاس منعقد ہوا، جس میں صوبے میں جاری ماس ٹرانزٹ پراجیکٹس اور مجوزہ ایکو فرینڈلی ای-ٹیکسی منصوبے پر تفصیلی بریفنگ دی گئی۔
اجلاس میں ییلو لائن ماس ٹرانزٹ سسٹم کی فزیبلٹی سٹڈی رپورٹ پیش کی گئی اور پنجاب میں ایکو فرینڈلی ای-ٹیکسی پراجیکٹ کے بارے میں تفصیلات سے آگاہ کیا گیا۔ وزیراعلیٰ نے ای-ٹیکسی کے فنانشل ماڈل کی اصولی منظوری دیتے ہوئے 1100 ای-ٹیکسیز کے ساتھ پائلٹ پراجیکٹ کے جلد اجراء پر اتفاق کیا۔ ای-ٹیکسیز کے لیے ای-چارجنگ سٹیشن پر سولر پاور سسٹم نصب کرنے کا بھی فیصلہ کیا گیا۔
وزیراعلیٰ مریم نواز شریف نے گوجرانوالہ میں ماس ٹرانزٹ سسٹم کے لیے مزید روٹس پر رپورٹ طلب کرتے ہوئے ہدایت کی کہ روٹس کا تعین عوام کی سہولت کو مدنظر رکھتے ہوئے کیا جائے۔ انہوں نے جناح ٹرمینل تا ہربنس پورہ ییلو لائن پراجیکٹ پر جلد از جلد کام شروع کرنے کا حکم بھی دیا۔
اجلاس میں ای-ٹیکسی سکیم میں حکومت پنجاب کی جانب سے سبسڈی کی فراہمی پر بھی بریفنگ دی گئی اور پٹرول پمپس کے ساتھ چارجنگ سٹیشن قائم کرنے کی تجویز کا جائزہ لیا گیا۔
DATE . May/6/2025
