لاہور -وزیراعلیٰ پنجاب مریم نواز شریف سے یورپی یونین کے پارلیمانی وفد برائے جنوبی ایشیا (DSAS) نے ملاقات کی۔ ملاقات میں باہمی دلچسپی کے امور، دوطرفہ تعلقات، تجارت، تعلیم اور سرمایہ کاری کے فروغ پر تفصیلی تبادلہ خیال کیا گیا۔
وزیراعلیٰ مریم نواز شریف نے یورپی یونین کو تعلیم، آئی ٹی، گرین انرجی اور صحت کے شعبوں میں سرمایہ کاری کی پیش کش کی اور تجارت، امن، ترقی اور مشترکہ اہداف کے لیے تعلقات کو مزید مضبوط بنانے پر اتفاق کیا۔ انہوں نے کہا کہ یورپی یونین پارلیمانی وفد کی آمد دوطرفہ مضبوط، پُرامن اور دوستانہ تعلقات کا مظہر ہے۔
مریم نواز شریف نے زور دیا کہ پاکستان یورپی یونین کے ساتھ قابل اعتماد دوستی کو قدر کی نگاہ سے دیکھتا ہے اور یورپی یونین پاکستان کا نہ صرف ایک اہم شراکت دار ہے بلکہ دنیا میں استحکام کی آواز بھی ہے۔ انہوں نے جی ایس پی پلس کی سہولت ملنے سے پاکستان کی برآمدات، بالخصوص ٹیکسٹائل کے شعبے میں ہونے والی نمایاں بہتری کا ذکر کیا۔ وزیراعلیٰ نے یقین دلایا کہ پنجاب انسانی حقوق اور لیبر ریفارمز سمیت تمام تقاضے پورے کرنے کے لیے بھرپور اقدامات کر رہا ہے۔
مریم نواز شریف نے پنجاب کو پاکستان کی معیشت کا دل قرار دیتے ہوئے کہا کہ صوبہ سرمایہ کاری کے لیے سازگار ماحول مہیا کر رہا ہے۔ انہوں نے زراعت، توانائی، ڈیجیٹل انفراسٹرکچر اور ماحولیاتی منصوبوں میں یورپی یونین کے ساتھ تعاون بڑھانے کی خواہش کا اظہار کیا۔ انہوں نے پاکستانی نوجوانوں کو باصلاحیت اور متحرک قرار دیتے ہوئے بتایا کہ انہیں عالمی جاب مارکیٹ سے منسلک کرنے کے لیے مختلف ٹریننگ کورسز کرائے جا رہے ہیں۔ انہوں نے اس بات پر خوشی کا اظہار کیا کہ پاکستانی طلبہ مسلسل تیسرے سال ایراسمس منڈس سکالرشپ حاصل کرنے والوں میں سرفہرست ہیں۔
وزیراعلیٰ نے علاقائی و عالمی امن کے لیے پاکستان کے پختہ عزم کا اعادہ کیا۔ یورپی یونین کے وفد نے حکومت پنجاب کے اختراعی اقدامات کو سراہا۔
DATE . Apr/19/2025
