لاہور: وزیر اعلیٰ پنجاب مریم نواز شریف نے عید الاضحیٰ کے موقع پر صوبے بھر میں فول پروف سکیورٹی انتظامات یقینی بنانے کا حکم دیا ہے۔ اس کے ساتھ ساتھ، انہوں نے مویشی منڈیوں میں بھی سکیورٹی بڑھانے کی خصوصی ہدایت جاری کی ہے۔
وزیراعلیٰ نے لاہور سمیت دیگر شہروں میں ٹریفک کی مسلسل مانیٹرنگ کا حکم دیتے ہوئے مویشی منڈیوں کے قریب ٹریفک مینجمنٹ کو بہتر بنانے کی ہدایت کی ہے۔
انہوں نے تمام شہروں میں ٹرانسپورٹ کے مقررہ کرایوں پر عملدرآمد یقینی بنانے کی بھی تاکید کی ہے۔
اس ضمن میں بسوں کی ونڈ سکرین پر کرائے نامے اور فٹنس سرٹیفکیٹ چسپاں کرنے کی ہدایت کی گئی ہے، اور زائد کرائے واپس کرانے کے ساتھ ساتھ وصول کرنے والوں کے خلاف کارروائی کا حکم بھی دیا گیا ہے۔
مریم نواز شریف نے لائیوسٹاک حکام کو مویشی منڈیوں میں موجودگی یقینی بنانے، جبکہ انتظامیہ اور پولیس افسران کو فیلڈ میں موجود رہنے کی ہدایت کی۔ انہوں نے صوبائی، ڈویژنل، ضلعی اور تحصیل سطح پر صورتحال کی مسلسل مانیٹرنگ اور متواتر رپورٹ پیش کرنے کا حکم بھی جاری کیا۔
DATE . JUN/6/2025
