اسلام آباد : وزیر دفاع خواجہ محمد آصف سے پاکستان میں برطانیہ کےہائی کمشنر جین میریٹ نے پیر کو اسلام آباد میں ملاقات کی۔دونوں اطراف نے متعدد شعبوں میں تعاون کو مضبوط بنانے کے اپنے عزم کا اعادہ کیا۔
وزیر دفاع نے برطانوی ہائی کمشنر کا پرتپاک خیرمقدم کیا اور دونوں ممالک کے درمیان دوطرفہ تعلقات کو مزید گہرا کرنے کی پاکستان کی خواہش کا اظہار کیا۔ ملاقات میں دونوں رہنماؤں کو باہمی دلچسپی کے امور، علاقائی سلامتی، دفاعی اور سٹریٹجک امور میں جاری تعاون پر تبادلہ خیال کا موقع ملا۔
ملاقات کے دوران فریقین نے متعدد شعبوں میں تعاون کو مضبوط بنانے کے اپنے عزم کا اعادہ کیا۔
ملاقات کے دوران پاکستان انٹرنیشنل ایئرلائنز (پی آئی اے) کی برطانیہ کے لیے پروازوں میں اضافے کے ساتھ ساتھ دونوں ممالک کے درمیان فضائی رابطوں کو بڑھانے کے لیے اضافی ایئرلائنز کو شامل کرنے کے معاملے پر بھی تبادلہ خیال کیا گیا۔
ملاقات کے آ خر میں تعمیری بات چیت جاری رکھنے اور پاکستان اور برطانیہ کے درمیان دیرینہ شراکت داری کو مزید مستحکم کرنے کے لئے مشترکہ مفاہمت ہوئی۔
DATE . Oct/14/2025
