اسلام آباد: وفاقی وزیر اطلاعات عطاء اللہ تارڑ نے بین الاقوامی اور مقامی میڈیا کے نمائندگان کے ہمراہ لائن آف کنٹرول (ایل او سی) کا دورہ کیا ہے۔ وزارت اطلاعات نے اس دورے میں میڈیا کے نمائندگان کو سہولت فراہم کی، جس کا بنیادی مقصد بھارت کی جانب سے پھیلائے گئے جھوٹے اور بے بنیاد پروپیگنڈے کو دنیا کے سامنے بے نقاب کرنا تھا۔
اس دورے کے دوران زمینی حقائق میڈیا کے سامنے پیش کیے گئے اور انہیں اُن مخصوص مقامات پر لے جایا گیا جنہیں بھارت کی جانب سے مبینہ دہشت گردی کے ٹھکانے قرار دیا جاتا رہا ہے۔ میڈیا کے نمائندوں نے مقامی آبادی کی گواہی سنی اور حالات کا خود مشاہدہ کیا، جس سے انہیں بھارتی دعوؤں کی حقیقت جاننے کا موقع ملا۔
وفاقی وزیر اطلاعات عطاء اللہ تارڑ نے اس موقع پر میڈیا سے گفتگو کرتے ہوئے کہا کہ بھارت کی جانب سے بارہا پاکستان کے خلاف بے بنیاد الزامات لگائے گئے ہیں۔ انہوں نے کہا کہ آج پاکستان نے عالمی اور ملکی میڈیا کے سامنے تمام حقائق رکھ دیے ہیں اور یہ ثابت کر دیا ہے کہ جن مقامات کو بھارت خیالی دہشت گرد کیمپس قرار دیتا رہا ہے، وہ دراصل عام شہری آبادی کے علاقے ہیں۔
عطاء اللہ تارڑ نے زور دیتے ہوئے کہا کہ پاکستان ایک ذمہ دار ریاست ہے جو نہ صرف علاقائی بلکہ عالمی امن کے لیے بھی پرُعزم ہے۔ انہوں نے واضح کیا کہ پاکستان دنیا کے کسی بھی حصے میں دہشت گردی یا دہشت گردانہ سرگرمیوں کی مذمت کرتا ہے۔ انہوں نے کہا کہ پاکستان نے اپنے عمل سے بارہا ثابت کیا ہے کہ وہ امن کا داعی ہے، تاہم اپنی خودمختاری کے دفاع کے لیے وہ ہر حد تک جائے گا۔
وفاقی وزیر اطلاعات نے بھارت کو مشورہ دیا کہ وہ الزام تراشی سے پہلے اپنے زیر قبضہ کشمیر میں انسانی حقوق کی سنگین خلاف ورزیوں کا نوٹس لے۔ انہوں نے کہا کہ بھارت اپنی داخلی ناکامیوں کو چھپانے کے لیے لائن آف کنٹرول پر پروپیگنڈا کرتا ہے، لیکن آج عالمی میڈیا نے خود اپنی آنکھوں سے اصل حقیقت دیکھ لی ہے۔
عطاء اللہ تارڑ نے ایک بار پھر دنیا کے سامنے واضح کیا کہ پاکستان علاقائی امن کے لیے پُرعزم ہے، تاہم کسی بھی بھارتی جارحیت کا فوری اور منہ توڑ جواب دیا جائے گا۔
DATE . May/5/2025
